Samarqand shahrida 6 km uzunlikdagi yerusti metropoliteni quriladi

Samarqand shahrida 6 km uzunlikdagi yerusti metropoliteni, 112 kmlik ichki yo‘llar, 2 ta yirik ko‘prik, 7,2 kmlik ichki kommunikatsiya tunneli, 180 kmda sug‘orish quvurlari va 14 kmda kanallar barpo etilishi rejalashtirilmoqda. 

Prezident qaroriga muvofiq, 2023-2030-yillarda “Shirin” zamonaviy biznes markazi va turar joy majmuasi qurilishiga oid ishlar olib borilmoqda. Shu asosda Vazirlar Mahkamasining taklifiga binoan, Samarqand shahriga Samarqand tumanidan 170 gektar va Oqdaryo tumanidan 243 gektar yer maydonlarini berish rejalashtirilgan.

Bugun, 14-yanvar kuni Oliy Majlis Qonunchilik palatasining navbatdagi yalpi majlisida Samarqand shahri, Samarqand va Oqdaryo tumanlari chegaralarini o‘zgartirish masalasi muhokama qilindi.

Loyihada 254 ta ko‘p qavatli uy, 19 ta biznes markaz, 50 ta ijtimoiy obyekt, 89 ta ko‘ngilochar va savdo majmuasi, shuningdek, tarixiy shahar qurilishi ko‘zda tutilgan.

Deputatlar ushbu o‘zgarishlar aholi turmush sharoitlarini yaxshilash va ishlab chiqarish hamda xizmat ko‘rsatish sohalarini kengaytirishga xizmat qilishini ta’kidladilar.

Majlis yakunida qaror loyihasi deputatlar tomonidan qabul qilindi.