O‘zbekistonda o‘rtacha pensiya 10 yilda 3,3 baravarga oshdi

Milliy statistika qo‘mitasi ma’lumotlariga ko‘ra, 2025-yilda O‘zbekistonda o‘rtacha oylik pensiya miqdori 1 649,2 ming so‘mni tashkil etgan. Bu ko‘rsatkich 2016-yilga nisbatan 3,3 barobarga ko‘p.O‘rtacha oylik pensiya miqdori yillar kesimida quyidagicha bo‘lgan:

• 2016-yil — 494,2 ming so‘m;
• 2017-yil — 556,8 ming so‘m;
• 2018-yil — 640,5 ming so‘m;
• 2019-yil — 733,2 ming so‘m;
• 2020-yil — 848,5 ming so‘m;
• 2021-yil — 963,6 ming so‘m;
• 2022-yil — 1 080,8 ming so‘m;
• 2023-yil — 1 234,5 ming so‘m;
• 2024-yil — 1 495,6 ming so‘m;
• 2025-yil — 1 649,2 ming so‘m.

Iqtisodiyot va moliya vazirligi tomonidan tayyorlangan fiskal strategiyaga ko‘ra, O‘zbekiston o‘rtacha pensiya miqdori bosqichma-bosqich oshib borishi prognoz qilinmoqda.Hozirda 1,7 mln bo‘lgan o‘rtacha pensiya 2027-yilda 1,8 mln so‘mga, 2028-yilda 1,9 mln so‘mga hamda 2029-yilga kelib 2,1 mln so‘mga yetishi kutilmoqda.

Eslatib o’tamiz, Oliy Majlis Senati 7-avgust kuni “Fuqarolarning davlat pensiya ta’minoti to‘g‘risida”gi qonunga kiritilgan o‘zgartishlarni ma’qullagandi. Unga ko’ra, barcha ushlab qolishlardan keyin pensionerga to‘lanadigan summa rasman belgilangan minimal iste’mol xarajatlari — 715 ming so‘mdan kam bo‘lmasligi kerak.