O‘zbekistonda rieltorlar faoliyatiga yangi talablar joriy etiladi

O‘zbekistonda turar joy va noturar obyektlar bilan bog‘liq bitimlarda vositachilik xizmatlarini ko‘rsatishga doir yangi talablarni belgilovchi normativ-huquqiy hujjat imzolandi. Bu haqda Adliya vazirligi matbuot xizmati xabar berdi.

Rieltorlik sohasini nazorat qiluvchi vakolatli davlat organi etib Davlat aktivlarini boshqarish agentligi (DABA) belgilandi.

Qonuniy faoliyat yuritish uchun rieltorlarga shtrix-kodga ega malaka sertifikati talab etiladi. Bunday sertifikatlarni nomzodlar maxsus ta’limdan o‘tib, imtihonlarni muvaffaqiyatli topshirganidan so‘ng professional jamoat birlashmalari beradi.

Rieltorlar faqat rasmiy kompaniya xodimi sifatida faoliyat yuritishi mumkin. Kompaniyaning o‘zi va uning xodimlari esa ma’lumotlari Yagona reyestrga kiritilgandan keyingina faoliyat yuritish huquqiga ega bo‘ladi.

Normativ hujjatda ruxsat etilgan xizmatlarning quyidagi turlari belgilangan:

• ko‘chmas mulk va unga bo‘lgan huquqlar bo‘yicha shartnomalar tuzishda vositachilik qilish;
• ko‘chmas mulk obyektlari bilan savdolarni tashkil etish;
• ko‘chmas mulkni ishonchli boshqarish;
• axborot, maslahat va reklama xizmatlarini ko‘rsatish.

Bundan tashqari, xususiy multilistинг platformasini ishga tushirish ko‘zda tutilmoqda. Ushbu tizim ma’lumotlarni elektron tarzda almashish imkonini beradi va buyurtmachilarga shoshilinch shartnomalar bo‘yicha “yagona darcha” tamoyili asosida xizmat ko‘rsatishni ta’minlaydi.

Yangi qoidalar hujjat rasmiy e’lon qilingan kundan uch oy o‘tib, 2026-yil 8-noyabrdan kuchga kiradi.