O‘zbekistonda qurilish litsenziyalarini 5 daqiqada rasmiylashtirish tizimi joriy etiladi

Prezident Shavkat Mirziyoyevga uy-joy kommunal xo‘jaligi va qurilish sohasida byurokratik yuklamani kamaytirish hamda nazoratni kuchaytirishga qaratilgan takliflar taqdim etildi. Bu haqda davlat rahbari matbuot xizmati xabar berdi.

Hozirda qurilish ishlarini boshlash uchun 8 ta hujjat talab etiladi va arizalarni ko‘rib chiqish muddati 3 oydan 1 yilgacha davom etadi. Rejaga ko‘ra, ushbu hujjatlarning 2 tasi bekor qilinadi, yana 2 tasi esa avtomatik shakllantiriladi. Natijada arizalarni ko‘rib chiqish muddati 7 baravarga qisqaradi.

Loyihalashga ruxsat berish va arxitektura-rejalashtirish topshiriqlarini taqdim etish jarayonlari ShaffofAI tizimi orqali yagona hujjatga birlashtiriladi. Avval 30 ish kunigacha davom etgan jarayon to‘liq avtomatlashtiriladi.

Loyiha, pudrat va ekspertiza tashkilotlarini litsenziyalashning yangi mexanizmi 3 tadan 30 tagacha hujjat yuklash talabini bekor qiladi. Ma’lumotlar davlat bazalari orqali tekshiriladi va litsenziya berish muddati 14 ish kunidan 5 daqiqagacha qisqartiriladi.

Qayd etilishicha, o‘tgan yili turli kamchiliklar sabab foydalanishga topshirish uchun berilgan 20 mingdan ortiq ariza rad etilgan va ularni bartaraf etish 3 oygacha vaqt olgan. Endilikda davlat obyektlarini qabul qilishda talab qilinadigan hujjatlar soni 3 tadan 1 tagacha qisqartiriladi. Deklaratsiya va nazorat xulosalari elektron shaklga o‘tkazilib, obyektlarni qabul qilish muddati 2 oydan 15 kungacha kamaytiriladi.

Shuningdek, xavfsizlik va mustahkamlikka ta’sir qilmaydigan kichik chetlanishlar mavjud bo‘lsa, obyektlarni foydalanishga topshirishga ruxsat beriladi.

Qiymati 3 mlrd so‘mdan yuqori bo‘lgan ijtimoiy, turar joy, tijorat va turizm obyektlari qurilish maydonlarida videokuzatuv tizimlarini o‘rnatish majburiy etib belgilanadi. Bu qurilishdagi noqonuniy chetlanishlarni aniqlashga xizmat qiladi.