Prezident Toshkent xalqaro moliya markazi to‘g‘risidagi qonunni imzoladi

O‘zbekiston Prezidenti 10-iyul kuni “Toshkent xalqaro moliya markazi to‘g‘risida”gi Konstitutsiyaviy qonunni imzoladi. Hujjat mamlakatda yangi xalqaro moliyaviy yurisdiksiyani tashkil etish va uning faoliyat yuritishining huquqiy asoslarini belgilaydi. Bu haqda Prezident Administratsiyasi rahbari Saida Mirziyoyeva ma’lum qildi.

Qonunga muvofiq, Toshkent xalqaro moliya markazi (TXMM) alohida huquqiy maqomga ega bo‘ladi. Markaz ingliz huquqi tamoyillari asosida faoliyat yuritib, o‘zining maxsus tartibga solish tizimi, mustaqil tijorat sudi hamda xalqaro standartlarga mos huquqiy muhitiga ega bo‘ladi.

Qayd etilishicha, bunday model xalqaro investorlar, banklar, investitsiya fondlari va moliyaviy kompaniyalar uchun odatiy bo‘lgan huquqiy himoya hamda tijorat nizolarini hal etish mexanizmlarini taqdim etadi. Natijada O‘zbekistonning investitsiyaviy jozibadorligini oshirish, xalqaro kapitalni jalb qilish va zamonaviy moliyaviy xizmatlar bozorini rivojlantirishga xizmat qilishi kutilmoqda.

Toshkent xalqaro moliya markazini tashkil etish mamlakat moliya bozorini rivojlantirish va O‘zbekistonni jahon moliya tizimiga integratsiya qilishga qaratilgan islohotlarning muhim bosqichlaridan biri sifatida baholanmoqda. Hukumat yangi yurisdiksiya yirik investitsiya loyihalarini amalga oshirish, yetakchi xalqaro moliya institutlarini jalb etish hamda kapital bozorini rivojlantirish uchun muhim platformaga aylanishiga umid qilmoqda.

Konstitutsiyaviy qonunning qabul qilinishi markaz faoliyatini yo‘lga qo‘yish uchun zarur huquqiy asosni yaratadi hamda uning huquqiy rejimi barqarorligining uzoq muddatli kafolatlarini belgilaydi. Bu esa xorijiy investorlar uchun kapitalni joylashtirish bo‘yicha qaror qabul qilishda muhim omillardan biri hisoblanadi.