Bojxona organlari preferensiyalar huquqini oldindan ma’lum qiladi

2025-yil 1-iyulda Iqtisodiyot va moliya vaziri tovarlar uchun preferensiyalarni qo‘llash bo‘yicha bojxona organlarining dastlabki qarorlari to‘g‘risidagi nizomni tasdiqlash haqidagi buyruqni imzoladi. Bu haqda Norma xabar bermoqda.

Endilikda manfaatdor shaxslar bojxona yuk deklaratsiyasini topshirishdan avval tovarlarni import, vaqtincha olib kirish yoki eksport rejimlariga rasmiylashtirish uchun bojxona organlariga ariza bilan murojaat qilishlari mumkin bo‘ldi.

Ariza 10 ish kuni ichida ko‘rib chiqiladi. Tegishli idoralardan rasmiy tushuntirishlar olish zarur bo‘lgan hollarda, muddat yana bir oyga uzaytirilishi mumkin.

Qaror rahbar yoki uning o‘rinbosari tomonidan qabul qilinadi. Shundan so‘ng ariza beruvchi yig‘imni to‘laydi va hujjatni qog‘oz yoki elektron shaklda oladi.

Hujjat 2025-yil 2-oktabrdan kuchga kiradi.