Panama O‘zbekistonning offshor hududlar ro‘yxatidan chiqarildi

Panama endi O‘zbekistonda majburiy valyuta monitoringi talab etiladigan hududlar ro‘yxatida qayd etilmaydi. Bu haqda Soliq qo‘mitasi, Iqtisodiyot va moliya vazirligi hamda Markaziy bankning qo‘shma qarorida ma’lum qilindi.

Mazkur o‘zgarishlar yuridik va jismoniy shaxslar tomonidan amalga oshiriladigan valyuta operatsiyalarining asoslanganligini kuzatish tartibini belgilovchi Nizomga kiritildi. Hujjat uchta idoraning qo‘shma qarori bilan tasdiqlandi.

Shuningdek, qaror Savdo-sanoat palatasi hamda Bosh prokuratura huzuridagi Iqtisodiy jinoyatlarga qarshi kurashish departamenti tomonidan ham kelishib olingan.

Hozirda imtiyozli soliq sharoitlarini taklif qiladigan va moliyaviy operatsiyalar haqidagi ma’lumotni oshkor qilmaydigan davlatlar reestriga 68 ta mamlakat kiritilgan. Avvalroq ushbu yurisdiksiyalarning rezidentlari bilan operatsiyalar nazorat organlari tomonidan alohida e’tibor talab qilardi.