“O‘zbektelekom” aksiyalari yil boshidan buyon qariyb olti baravar qimmatlashdi

“O‘zbektelekom”ning oddiy aksiyalari juma kuni “Toshkent” Respublika fond birjasida tarixdagi eng yuqori narxini qayd etdi.

Yil boshidan buyon aksiyalar kotirovkasining nominal qiymati 5 899 so‘mdan ikki baravardan ko‘proqqa oshdi. Aprel oyida o‘tkazilgan kapitallashtirishni hisobga olganda esa aksiyalar qiymati qariyb olti baravar ko‘paygan.

Ijobiy dinamika avgustning birinchi haftasi davomida kuzatilmoqda. 4-avgust, seshanba kuni kompaniya aksiyalari narxi 8 ming so‘mdan oshdi, 6-avgust, payshanba kuni 10 ming so‘mlik chegarani bosib o‘tdi. 7-avgust kuni savdolar yakunida esa bitimlar narxi 11 989 so‘mga yetdi.

Aksiyalar narxining o‘sishiga kompaniyaning 2026-yil birinchi yarim yilligi bo‘yicha moliyaviy hisobotining e’lon qilinishi asosiy omil bo‘ldi. Telekom operatorining sof foydasi o‘tgan yilning mos davridagi 10 mlrd so‘mdan 896 mlrd so‘mga yetdi. Tushum 12,6% ga oshib, 5,8 trln so‘mni, yalpi foyda esa 2,4 trln so‘mni tashkil etdi.

Valyuta kurslari farqidan olingan moliyaviy natijalar yaxshilangani ham kompaniya ko‘rsatkichlariga ijobiy ta’sir ko‘rsatdi. Ushbu yo‘nalishdagi daromadlar 241,4 mlrd so‘mdan 429 mlrd so‘mga oshgan bo‘lsa, zararlar 801,2 mlrd so‘mdan 380,5 mlrd so‘mgacha kamaygan.

Bozor ishtirokchilari qiziqishining oshishiga O‘zbekiston Milliy investitsiya jamg‘armasi (UzNIF) hisobotining e’lon qilinishi ham sabab bo‘ldi. Mustaqil baholash natijalariga ko‘ra, “O‘zbektelekom”ning bitta aksiyasi 17,5 ming so‘mga baholangan. Bu amaldagi bozor narxidan ikki baravardan ko‘proqni tashkil etadi.

Kompaniya UzNIF sof aktivlarining 18,25% ini tashkil qiladi. Jamg‘arma balansidagi 30% lik aksiyalar paketi esa $479,3 mlnga baholangan.

Moliyaviy hisobot e’lon qilingan paytda “O‘zbektelekom” aksiyalari 6 199,9 so‘mdan savdo qilinayotgan edi. Shu narxda kompaniyaning kapital rentabelligi (ROE) 45%, aktivlar rentabelligi (ROA) 8,5% ni tashkil etgan. P/E multiplikatori 3,44, P/B ko‘rsatkichi esa 1,55 darajasida qayd etilgan.