“O‘zbekneftgaz” dizel yoqilg‘isi va mazut ishlab chiqarish bo‘yicha reja ko‘rsatkichlarini bajara olmadi

2026-yilning dastlabki olti oyida “O‘zbekneftgaz” aksiyadorlik jamiyati debitorlik qarzlarini qisqartirdi, biroq import xomashyosi taqchilligi sabab dizel yoqilg‘isi va mazut ishlab chiqarish bo‘yicha belgilangan ko‘rsatkichlarga erisha olmadi. Bu haqda kompaniya matbuot xizmati xabar berdi.

Boshqaruv raisi Abdug‘ani Sanginov raisligida o‘tkazilgan yig‘ilishda joriy yilning birinchi yarim yilligi yakunlari sarhisob qilindi. Qayd etilishicha, kompaniyaning qarz yuki 3,1 ko‘rsatkichdan 2,7 gacha kamaygan. Qimmat kreditlarni qayta moliyalashtirish va muddatidan oldin yopish hisobiga foiz to‘lovlaridan 219 mlrd so‘m tejalgan.

Yil boshidan buyon debitorlik qarzlari 1,2 trln so‘mga qisqargan. Bundan tashqari, xodimlarning ish haqi oshirilganiga qaramay, rejalashtirilgan xarajatlar 1 trln so‘mga kamaytirilgan.

Neft bazalari faoliyatida ham ijobiy natijalar qayd etilgan. O‘tgan yilning birinchi yarmida 14 ta neft bazasi jami 36,5 mlrd so‘m zarar ko‘rgan bo‘lsa, joriy yilning shu davrida ular 250 ming tonna benzin va 114 ming tonna dizel yoqilg‘isi sotib, 5,4 mlrd so‘m sof foyda olgan.

Shunga qaramay, kompaniya dizel yoqilg‘isi va mazut ishlab chiqarish bo‘yicha belgilangan reja ko‘rsatkichlarini bajara olmagan. Bunga geosiyosiy vaziyat sabab xorijdan xomashyo yetkazib berish hajmining cheklangani sabab bo‘lgani qayd etilgan.

Rahbariyat yil yakuniga qadar ushbu kamchiliklarni bartaraf etish vazifasini qo‘ygan. Qazib olish va qayta ishlash hajmi pasayishiga yo‘l qo‘ygan mas’ullar vaziyatni tiklash bo‘yicha reja bilan birga tushuntirish xati taqdim etishi lozim.

Yig‘ilishda kuz-qish mavsumiga tayyorgarlik masalalariga ham alohida e’tibor qaratilgan. So‘nggi paytlarda ob-havo anomaliyalari ko‘paygani sababli yoqilg‘i-moylash materiallari va benzin zaxiralarini oldindan shakllantirish topshirilgan.

Gaz qazib olish yo‘nalishida esa avval yopilgan quduqlarni qayta o‘rganish, texnik imkoniyati saqlanib qolganlarini ishga tushirish hamda ularni doimiy nazorat ostiga olish vazifasi belgilangan.

Joriy yilning ikkinchi yarmida elektr energiyasini tejash dasturlarini joriy etish, o‘z energiya manbalarini yaratish va Xitoy hamkorlari bilan qo‘shma investitsiya loyihalarini jadallashtirish rejalashtirilgan.

Shuningdek, yil yakuniga qadar xodimlarning yashash sharoitlarini yaxshilash maqsadida 26 ta yotoqxona va 17 ta vagon-uy ta’mirlanib, foydalanishga topshirilishi ko‘zda tutilgan.