O‘zbekiston 2035-yilgacha islomiy moliyasi rivojlanishi bo‘yicha dunyoda yetakchiga aylanishi mumkin

Yaqin o‘n yillikda O‘zbekiston Fors ko‘rfazi davlatlaridan investitsiyalarni jalb qilish hisobiga muqobil bank xizmatlari rivojlanishining rekord sur’atlarini namoyish etishi kutilmoqda. Bu haqda Toshkent xalqaro investitsiya forumidagi panel muhokamasi davomida ma’lum qilindi.

Inception Elite Group prezidenti Ramona Maneskuning ta’kidlashicha, transport, energetika va raqamli infratuzilmani rivojlantirish iqtisodiy o‘sishning asosiy omili hisoblanadi. Uning fikricha, so‘nggi normativ o‘zgarishlar O‘zbekiston bozorining uzoq muddatli strategik hamkorlikka yo‘naltirilgan xorijiy investorlar uchun jozibadorligini oshirdi.

Manesku xususiy kapitalning barqaror oqimini ta’minlash uchun davlat tartibga solishning prognoz qilinuvchanligi, bitimlarning shaffofligi va moliyaviy institutlarning ishonchliligini kafolatlashi zarurligini ta’kidladi.

AD Wealth boshqaruvchi hamkori Alisher Jumanovning ma’lum qilishicha, Aqua Power, Masdar va TAQA kompaniyalari allaqachon O‘zbekiston iqtisodiyotidagi yirik xorijiy investorlar qatoriga kirgan. Uning prognoziga ko‘ra, xorijiy islom banklari va fondlari ham shunga o‘xshash faollikni namoyon etadi.

Jumanov misol tariqasida Turkiya va Pokiston bozorlarini keltirdi. Xususan, Pokistondagi Meezan Bank bugungi kunda 15 mlrd dollarlik aktivlarni boshqarib, mamlakat moliya sektorining 30 foizini egallagan.

Mutaxassisning baholashicha, tegishli qonun qabul qilinganidan so‘ng yaqin o‘n yillikda O‘zbekiston hamkorlikka asoslangan moliyalashtirish segmenti kengayishi sur’atlari bo‘yicha dunyoda eng tez rivojlanayotgan bozorga aylanishi mumkin. Buning uchun barcha ishtirokchilar uchun teng raqobat sharoitlarini saqlab qolish va siyosiy yo‘nalishda keskin o‘zgarishlarga yo‘l qo‘ymaslik muhim omil bo‘lib qoladi.

Jumanovning qo‘shimcha qilishicha, Islom taraqqiyot banki va boshqa ixtisoslashgan tashkilotlar vakillari allaqachon Markaziy bank bilan maslahatlashuvlarni boshlagan.

IMAN fintech kompaniyasi asoschisi va bosh direktori Rustam Rahmatovning aytishicha, O‘zbekiston aholisining qariyb 95 foizi islom diniga e’tiqod qiladi va fuqarolarning sezilarli qismi an’anaviy kredit mahsulotlaridan foydalanishni istamaydi.

Uning so‘zlariga ko‘ra, 2021-yildan buyon joriy etilayotgan yangi moliyaviy vositalar bank xizmatlaridan foydalanmayotgan aholini rasmiy iqtisodiyotga integratsiya qilish muammosini hal etishga qaratilgan.