O‘zbekiston Xitoydan benzin va dizel yoqilg‘isi import qilishi mumkin

O‘zbekiston Xitoyning CNPC va PetroChina kompaniyalaridan avtomobil benzini va dizel yoqilg‘isi xarid qilish imkoniyatini ko‘rib chiqmoqda. Bu haqda 27-oktabr kuni “O‘zbekneftgaz” boshqaruvi raisi o‘rinbosari Farid Mo‘minov matbuot anjumanida ma’lum qildi.

Uning so‘zlariga ko‘ra, muzokaralarda oktan soni 92 va undan yuqori bo‘lgan benzin, shuningdek, dizel yoqilg‘isi yetkazib berish masalasi ko‘rib chiqilmoqda. Import hajmi ichki bozor ehtiyojlaridan kelib chiqib belgilanadi.

Davlat kompaniyasi Xitoy hamkorlari bilan hamkorlik yoqilg‘i yetkazib berish manbalarini diversifikatsiya qilish va mamlakatni neft mahsulotlari bilan ta’minlashdagi uzilishlar xavfini kamaytirish imkonini berishiga umid qilmoqda.

Tayyor yoqilg‘i xarid qilishdan tashqari, tomonlar Buxoro neftni qayta ishlash zavodida qayta ishlash uchun neft va gaz kondensati yetkazib berishni ko‘paytirish masalasini ham muhokama qilmoqda.

20-oktabr kuni “O‘zbekneftgaz” boshqaruvi raisi Abdulg‘ani Sanginov CNPC prezidenti Chjou Sinxua boshchiligidagi delegatsiya bilan uchrashgan. Muzokaralarda neft mahsulotlarini uzoq muddatli yetkazib berish, neft-gaz sohasidagi hamkorlikni kengaytirish va qo‘shma loyihalarni amalga oshirishni jadallashtirish masalalari ko‘rib chiqilgan.

“O‘zbekneftgaz” ma’lumotlariga ko‘ra, CNPC bilan hamkorlikning umumiy hajmi 1 mlrd dollardan oshgan. Bu summaga import shartnomalari, servis xizmatlari va qo‘shma loyihalar kiradi.

Xitoy kompaniyalari bilan muzokaralar qish mavsumiga tayyorgarlik ko‘rilayotgan bir paytda olib borilmoqda. Avvalroq “O‘zbekneftgaz” neft bazalaridagi avtomobil benzini zaxiralari o‘tgan yilning mos davriga nisbatan 2,5 barobarga oshirilganini ma’lum qilgan edi.

2026-yilning yanvar–sentabr oylarida davlat kompaniyasi 773,5 ming tonna avtomobil benzini ishlab chiqargan. Bu bilan ishlab chiqarish rejasi 100,2% ga bajarilgan.