O‘zbekiston va Ozarbayjon neft mahsulotlarini birgalikda ishlab chiqarishni yo‘lga qo‘yishi mumkin

O‘zbekiston va Ozarbayjon energetika sohasida hamkorlikning yangi yo‘nalishlarini, jumladan, avtomobil va aviatsiya yoqilg‘isini birgalikda ishlab chiqarishni ko‘rib chiqmoqda. Bu haqda energetika vaziri Sherzod Xo‘jayev O‘zbekiston 24 telekanaliga bergan intervyusida ma’lum qildi.

Uning so‘zlariga ko‘ra, ikki davlatning energetika sohasidagi hamkorligi bir vaqtning o‘zida bir nechta yo‘nalishda rivojlanmoqda. Ulardan biri Ustyurt platosida uglevodorodlarni qazib olish loyihasidir.

Yana bir yo‘nalish O‘zbekistonda ishlab chiqarilgan “yashil” elektr energiyasini Qozog‘iston va Ozarbayjon orqali Yevropaga eksport qilish bilan bog‘liq.

Bundan tashqari, tomonlar O‘zbekiston ehtiyojlarini ta’minlash uchun neft mahsulotlarini, xususan, avtomobil va aviatsiya yoqilg‘isini birgalikda ishlab chiqarish imkoniyatini ko‘rib chiqmoqda.

Taklif O‘zbekistondagi neftni qayta ishlash zavodlari bilan hamkorlik qilishni, shuningdek, Ozarbayjonda qurilayotgan yangi neftni qayta ishlash zavodi (NQIZ) loyihasida O‘zbekiston tomonining ishtirokini nazarda tutadi. Korxonada ishlab chiqarilgan mahsulotning bir qismi keyinchalik O‘zbekistonga yetkazib berilishi mumkin.

Xo‘jayevning baholashicha, bunday hamkorlik O‘zbekiston ichki bozorini neft mahsulotlari bilan ta’minlash ishonchliligini oshirishga xizmat qiladi. Vazir, shuningdek, Ozarbayjon bilan birgalikda O‘zbekistonning “yashil” elektr energiyasini Yevropaga yetkazib berish bo‘yicha qo‘shma loyihani ham istiqbolli yo‘nalish deb atadi.