Raqobat qo‘mitasi “Tashabbusli budjet”da pullik ovoz berish reklamasiga qarshi kurashni boshladi

O‘zbekistonda “Tashabbusli budjet” doirasida ovoz berish evaziga pul mukofoti va’da qilayotgan uchinchi tomon Telegram-botlarini targ‘ib qilayotgan shaxslarga nisbatan tekshiruvlar boshlandi. Bu haqda Raqobatni rivojlantirish va iste’molchilar huquqlarini himoya qilish qo‘mitasi matbuot xizmati xabar berdi.

“Tashabbusli budjet” loyihasi fuqarolarga o‘z hududlari uchun ustuvor ijtimoiy takliflarni mustaqil tanlash imkonini berish maqsadida yaratilgan. Jarayonda ishtirok etish ixtiyoriy bo‘lib, moliyaviy rag‘batlantirishni nazarda tutmaydi.

Shunga qaramay, ijtimoiy tarmoqlarda norasmiy servislar orqali mukofot evaziga ovoz berishni taklif qiluvchi e’lonlar paydo bo‘ldi. Odamlarni chalg‘itish maqsadida tashkilotchilar Open Budget logotiplari va “rasmiy” so‘zidan foydalangan.

Idora eslatishicha, qonuniy ovoz berish faqat Open Budget portali, uning Android va iOS operatsion tizimlari uchun mo‘ljallangan mobil ilovalari hamda yagona rasmiy Telegram-bot orqali amalga oshiriladi.

Ovozlar uchun har qanday to‘lovlar taqiqlangan bo‘lib, bunday harakatlar jarayonning shaffofligini buzadi va huquqiy oqibatlarga olib keladi.

Choralar allaqachon O‘tkir Shodmonov, Abdurasul Ibragimov (Mominlive.1), Asilbek Amirov (Aslbek_emir) va Jasur Shodiyev (jasjannew) kabi qator mashhur inflyuenserlarga nisbatan qo‘llanildi. Tushuntirish ishlari olib borilgach, ular o‘z sahifalaridan noqonuniy botlarni targ‘ib qiluvchi materiallarni o‘chirib tashladi. Regulyator takroriy qoidabuzarliklar aniqlansa, aybdor shaxslarga qonunchilikka muvofiq choralar ko‘rilishini ta’kidladi.

Avvalroq Iqtisodiyot va moliya vazirligi “Tashabbusli budjet”ning ikkinchi mavsumi uchun loyihalar qabuli boshlanganini e’lon qilgandi. Fuqarolarning, jumladan, hamkorlikda moliyalashtirish sharti bilan beriladigan takliflari 15-iyuldan 3-avgustgacha qabul qilinadi. Davlat tomonidan moliyalashtiriladigan g‘olib loyihalar 1-sentabr kuni rasman e’lon qilinadi.