O‘zbekistonning oltin-valyuta zaxiralari mart oyida keskin qisqardi

O‘zbekiston Markaziy bankining oltin-valyuta zaxiralari 2026-yil mart oyida sezilarli darajada kamaydi. Regulyator ma’lumotlariga ko‘ra, zaxiralar bir oy ichida $77,1 mlrddan $69,0 mlrdgacha qisqargan.

Shu bilan birga, 2026-yilning birinchi choragi yakunlariga ko‘ra zaxiralar $2,7 mlrdga oshgan. 2025-yil davomida esa bu ko‘rsatkich $25,1 mlrdga ko‘paygan edi.

Mart oyida valyuta zaxiralari $8,8 mlrddan $7,6 mlrdgacha kamaydi. Oltin zaxiralari qiymati $6,8 mlrdga qisqarib, $60,9 mlrdni tashkil etdi. Biroq oltinning jismoniy hajmi 13,1 mln troya unsiyasidan 13,4 mln troya unsiyasigacha oshgan.

Zaxiralarning kamayishiga asosiy omil sifatida xalqaro bozorlarda oltin narxlarining pasayishi ko‘rsatilmoqda. Xususan, London fixing bo‘yicha narxlar 12 % ga tushib, bir unsiya uchun $4 554 ni tashkil etgan.

Shuningdek, Markaziy bank portfelidagi xalqaro qimmatli qog‘ozlar hajmi mart oyida $1,5 mlrd darajasida saqlanib qolgan. Bu ko‘rsatkich 2025-yil davomida $101,7 mlndan $1,5 mlrdgacha oshgan edi.