Oliy sud Plenumi majlisi tarixda ilk bor onlayn efirda namoyish etildi

O‘zbekistonda ilk bor Oliy sud Plenumi majlisi jamoatchilik uchun onlayn tarzda namoyish etildi.

Oliy sud raisi Robaxon Maxmudova raisligida o‘tkazilgan majlis Oliy sudning Interaktiv xizmatlar portali orqali real vaqt rejimida efirga uzatildi. Bu O‘zbekiston sud tizimi tarixida Plenum majlisining ochiq onlayn translyatsiya qilinishi bo‘yicha birinchi tajriba bo‘ldi.

Majlisda Oliy Majlis Senati a’zolari va Qonunchilik palatasi deputatlari, Oliy sud va quyi sudlar sudyalari, Bosh prokuror, Konstitutsiyaviy sud, Sudyalar oliy kengashi, Oila va xotin-qizlar qo‘mitasi, Sudyalar assotsiatsiyasi hamda Advokatlar palatasi rahbarlari, shuningdek, Oliy Majlisning Inson huquqlari bo‘yicha va Bola huquqlari bo‘yicha vakillari ishtirok etdi.

Bundan tashqari, manfaatdor vazirlik va idoralar vakillari, huquqni muhofaza qiluvchi organlar mas’ul xodimlari, huquqshunos olimlar hamda ommaviy axborot vositalari vakillari ham Plenum majlisida qatnashdi.

Oliy sudning qayd etishicha, Plenum majlisini ochiq onlayn formatda o‘tkazish sud tizimi faoliyatining shaffofligini oshirish va jamoatchilik uchun ochiqlikni ta’minlashga xizmat qiladi.