O‘zbekistonda noqonuniy qurilish va sifatsiz materiallar uchun javobgarlik kuchaytiriladi

O‘zbekistonda qurilish materiallari sifatini nazorat qilish va noqonuniy qurilishlarning oldini olish bo‘yicha yangi choralar amalga oshiriladi. Bu haqda prezident matbuot xizmati xabar berdi.

Qayd etilishicha, 2025-yilda qurilish obyektlarida 42 mingta qoidabuzarlik aniqlangan, inspektorlar esa yana 250 mingdan ortiq kamchiliklarni qayd etgan. Mualliflik va texnik nazoratni amalga oshiruvchi kompaniyalar uchun “Shaffof qurilish” platformasi asosida reyting tizimi joriy qilinadi, hujjat aylanishi esa to‘liq raqamlashtiriladi.

Qurilish materiallari majburiy tarzda nazorat.mc.uz tizimida ro‘yxatdan o‘tkaziladi. Sifatsiz materiallardan foydalangan pudratchilar uchun ma’muriy javobgarlik belgilanadi. Olis hududlardagi obyektlarda sifat nazoratini ta’minlash maqsadida mobil sinov laboratoriyalari tashkil etiladi.

2026-yil 1-aprel holatiga ko‘ra, mamlakatda 3,7 mingdan ortiq noqonuniy qurilish aniqlangan bo‘lib, shundan 1,9 mingtasi sanoat hududlariga to‘g‘ri keladi. Muammoni bartaraf etish uchun ma’lumotlar bazalari “Onlayn mahalla” platformasi bilan integratsiya qilinadi, ruxsatsiz qurilishlar uchun javobgarlik kuchaytiriladi.

Inspeksiya organlariga ko‘p qavatli uylarning tayanch konstruksiyalarini noqonuniy buzgan shaxslarga to‘g‘ridan to‘g‘ri jarima qo‘llash vakolati beriladi. Joriy yilda bunday holatlar soni 2,4 mingta bo‘lgani qayd etildi. Mamlakatdagi 15,2 mingta 50 yildan oshgan uy-joylarni rekonstruksiya qilishni cheklash rejalashtirilmoqda.

Bundan tashqari, Toshkent, Namangan va Qarshi shaharlaridagi oliy ta’lim muassasalarida Vena universiteti hamda Italiyaning Sapienza universiteti bilan hamkorlikda mutaxassislar malakasini oshirishga qaratilgan qo‘shma ta’lim dasturlari yo‘lga qo‘yiladi.