NKMK 5 yilda oltin ishlab chiqarishni 30% ga oshirishni rejalashtirmoqda

O‘zbekistonning Navoiy kon-metallurgiya kombinati (NKMK) kompaniyasi kelgusi besh yil ichida oltin ishlab chiqarishni 30% ga oshirishni rejalashtirmoqda. Bu orqali korxona dunyoning yetakchi oltin ishlab chiqaruvchilari orasidagi o‘z mavqeini yanada mustahkamlashni maqsad qilgan, deb yozadi Bloomberg.

Kompaniya ishlab chiqarish hajmini 2030-yilgacha qariyb 4 mln unsiyaga yetkazishni rejalashtirgan. Bu maqsad 2025-yildan boshlangan rivojlanish dasturi doirasida amalga oshiriladi va unga har yili $600 mlngacha sarmoya yo‘naltiriladi.

NKMK 2024-yilda 3,1 mln unsiya oltin ishlab chiqargan holda, Rossiyaning “Polyus” kompaniyasini ortda qoldirib, dunyoda to‘rtinchi o‘ringa chiqdi.

Shuningdek, kompaniya o‘z aksiyalarini London fond birjasi va Toshkent fond birjasida joylashtirishga tayyorgarlik ko‘rmoqda. Masalaga yaqin manbalar ma’lumotiga ko‘ra, NKMK Citigroup Inc., Morgan Stanley va JPMorgan Chase & Co. bilan birgalikda potensial IPO jarayonini ishlab chiqmoqda. Kompaniya o‘zining bozor qiymatini $20 mlrd atrofida baholashni maqsad qilgan.