“UzLiDeP” banklarda SMS o‘rniga push-xabarnomalarni joriy etishni taklif qildi

O‘zbekiston Liberal-demokratik partiyasi (“UzLiDeP”) kredit tashkilotlari mijozlarini xabardor qilishda an’anaviy SMS-xabarlarga muqobil tizimlarni joriy etishni taklif qildi. Bu haqda partiyaning rasmiy Telegram-kanalida ma’lum qilindi.

Qayd etilishicha, so‘nggi uch yil ichida kiruvchi SMS-xabarnomalar narxi ikki baravar oshib, 84,2 so‘mdan 168,4 so‘mga yetgan. Shu bilan birga, xizmat sifati pasayib, xabar yetkazilishida kechikishlar, matn hajmiga cheklovlar va kiberxavfsizlik darajasining pastligi kuzatilmoqda.

Xalqaro tajribaga ko‘ra, moliyaviy tashkilotlar yagona aloqa kanalidan bosqichma-bosqich voz kechmoqda. Ko‘plab mamlakatlarda ilova ichidagi push-xabarnomalar, elektron pochta va boshqa platformalar orqali xabardor qilish tizimlari joriy etilgan. Yevropa Ittifoqida esa tranzaksiyalarni tasdiqlash push-xabarnomalar orqali amalga oshiriladi, bu esa firibgarlik xavfini kamaytiradi.

Osiyo va Lotin Amerikasi davlatlarida ham messenjerlar orqali xabardor qilish keng qo‘llanilmoqda. Masalan, Singapurda bank ilovalari ichida generatsiya qilinadigan raqamli kalitlar joriy etilgan bo‘lib, ular mobil tarmoqqa bog‘liq emas va bir martalik parollarga ehtiyojni kamaytiradi.

Bunday yondashuvlar banklar uchun operatsion xarajatlarni 50–70% gacha qisqartirish imkonini beradi.

Shu munosabat bilan partiya bir qator takliflarni ilgari surdi. Xususan, banklar va to‘lov tizimlariga SMS-xabarlarga nisbatan xavfsiz va iqtisodiy jihatdan samarali muqobillarni joriy etish, bank kartalarini faqat bitta aloqa kanaliga bog‘lash amaliyotidan voz kechish hamda foydalanuvchilarga hisob harakati haqida ma’lumot olish usulini mustaqil tanlash huquqini berish taklif etildi.