Bankning sobiq aksiyadori Interpol qidiruviga berildi

Madad Invest Bank (hozirgi MyBank) ning sobiq yirik aksiyadori va kuzatuv kengashi raisi Mo‘minjon Yo‘ldoshev O‘zbekiston so‘roviga binoan xalqaro qidiruvga berildi. Tegishli ma’lumot 2026-yil 15-sentabr kuni Interpolning Qizil bildirishnoma (Red Notice) bazasida e’lon qilindi.

U xizmat mavqeidan foydalangan holda pul mablag‘larini o‘zlashtirish yoki talon-toroj qilish (rastrata) ayblovi bilan qidirilmoqda.

Yo‘ldoshev kim?

Yo‘ldoshev 1976-yil 18-fevralda Farg‘ona viloyatida tug‘ilgan. U ilgari Madad Invest Bank’ga aloqador bo’lib, 2022-yilda e’lon qilingan UzInvestigations surishtiruviga ko‘ra, u bankning yirik aksiyadori va kuzatuv kengashi raisi hisoblangan.

2023-yilda uning Madad Invest Bank’dagi ulushi 25,09% ga yetgan edi.

Ayni paytda bank MyBank nomi ostida faoliyat yuritmoqda. Korporativ boshqaruv bo‘yicha e’lon qilingan rasmiy ma’lumotlarda bankning amaldagi rahbariyati tarkibida Yo‘ldoshevning ismi qayd etilmagan.