Mirziyoyev $3 mlnga baholangan AI-startaplar bilan tanishdi

Shavkat Mirziyoyev Yangi Toshkent hududidagi Olimpiya shaharchasida tashkil etilgan startaplar va innovatsion loyihalar ko‘rgazmasi bilan tanishdi. Bu haqda prezident matbuot xizmati xabar berdi.

Ko‘rgazmada ekologiya, injiniring, kreativ industriya va boshqa yo‘nalishlardagi ishlanmalar namoyish etildi. Xususan, Farg‘ona tumanidagi “Obod ta’lim” o‘quv markazi taqdim etildi. Unda 600 nafardan ortiq kishi xorijiy tillarni o‘rganib, zamonaviy kasblarni egallagan. Muassasa Germaniya kompaniyalari bilan hamkorlikni ham yo‘lga qo‘ygan. Loyiha rahbari Islombek Muhammadjonov ushbu tashabbus mahalladagi yoshlar o‘rtasida ishsizlik va jinoyatchilikni bartaraf etishga yordam berganini ma’lum qildi.

Tadbir ishtirokchilari ekologik, ijtimoiy va inklyuziv startaplar rivoji haqida ham so‘zlab berdi. Jumladan, “Yashil tashabbuslar” jamg‘armasi loyihalari hamda “O‘qi va rivojlan” dasturi alohida ta’kidlandi.

Ekspozitsiyaning bir qismi mahalliy startap ekotizimi yutuqlariga bag‘ishlandi. Ko‘rgazma ishtirokchilaridan biri, Y Combinator akseleratsiyasidan o‘tgan va Meta Superintelligence kompaniyasida ishlagan Sardorbek Rahmatulloyev oyiga bir necha ming dollar daromad keltirayotgan o‘z biznesini yo‘lga qo‘yganini ma’lum qildi.

Sun’iy intellekt yordamida imtihonlarga tayyorlovchi Makon AI platformasi asoschisi Asilbek Ashurov o‘z loyihasi natijalari haqida hisobot berdi. Loyiha xorijiy mijozlardan $380 ming investitsiya jalb qilgan. Hozirda biznesning bahosi $3 mlnni tashkil etadi, platformadan foydalanuvchilar soni esa 100 ming nafarga yetgan.

Shavkat Mirziyoyev mamlakatda ham shunday yuqori texnologiyali yechimlarni joriy etish zarurligini ta’kidlab, tadbirkorlarning xorijiy bozorlarga chiqishini qo‘llab-quvvatlash davlatning ustuvor yo‘nalishlaridan biri ekanini qayd etdi.

Robototexnika va injiniring yo‘nalishida Turin politexnika universiteti talabasi Biloliddin Ismoilov mahalliy ishlab chiqilayotgan dronlarga qarshi kurash tizimlarini namoyish etdi. Nukus davlat texnika universiteti talabasi Ayzada Asanova esa yangi avlod avtomobillari konsepsiyasini taqdim etdi.

Tadbirda, shuningdek, Mutolaa ilovasi faoliyati natijalari ham muhokama qilindi. Dastur 5 mln marta yuklab olingan, unda o‘qilgan kitoblar soni esa 18 mln taga yetgan. Uchrashuv davomida O‘zbekiston madaniyat va san’at sohasi vakillarining yutuqlari ham alohida e’tirof etildi.

Yozuvchi Nilufer Ergasheva turizmni rivojlantirish maqsadida O‘zbekistonning adabiy xaritasini yaratishni taklif qildi. Bundan tashqari, u Marg‘ilon shahridagi Burhoniddin Marg‘inoniy yangi majmuasida ijodiy kechalar va konsert dasturlarini o‘tkazish tashabbusi bilan chiqdi.