Mingo‘rik − Chilonzor buyum bozori” yo‘nalishida yangi metro liniyasi qurilishi rejalashtirilmoqda

Shavkat Mirziyoyev Toshkent metropolitenini rivojlantirish bo‘yicha takliflar taqdimoti bilan tanishdi. Bu haqda prezident matbuot xizmati xabar berdi.

2030-yilga borib metropolitenning kunlik yo‘lovchilar oqimini 1,8 mln kishiga yetkazish rejalashtirilgan, hozirda Toshkent metropoliteni kuniga o‘rtacha 786 mingga yaqin yo‘lovchini tashiydi.

Buning uchun metropoliten tarmog‘ini 79 ta stansiya va 103 kilometrga kengaytirish ko‘zda tutilgan. Poyezdlar harakati intervallarini bosqichma-bosqich 1,5−3 daqiqagacha qisqartirish ham ko‘zda tutilgan.

Taqdimotda yangi yo‘nalishlarni qurish masalalari muhokama qilindi. Xususan, “Mingo‘rik − Chilonzor buyum bozori” yo‘nalishi bo‘yicha loyiha-smeta hujjatlarini ishlab chiqish rejalashtirilgan. Birinchi bosqichda “Mingo‘rik − Janubiy vokzal” yo‘nalishini qurish, ikkinchi bosqichda esa Chilonzor buyum bozorigacha uzaytirish imkoniyatlari o‘rganiladi.

Bundan tashqari, 2027−2030-yillarda yangi harakat tarkibini xarid qilish va elektr deposini qurish bo‘yicha takliflar tayyorlanadi.

Toshkent metropolitenini 2027−2035-yillarda rivojlantirish strategiyasini ishlab chiqish rejalashtirilgan. U metropoliten tarmog‘ini 2 barobar kengaytirish, yo‘lovchi tashish hajmini 2,5 barobar oshirish, energiya tejamkor va xavfsiz transport tizimini yaratish, shuningdek, xizmat ko‘rsatish sifati va yo‘lovchilar uchun qulaylik darajasini oshirish vazifalarini qamrab oladi.

Shuningdek, yo‘l haqini to‘lash tizimini takomillashtirish bo‘yicha takliflar taqdimot qilindi. Xalqaro tajribani inobatga olgan holda, masofaga qarab to‘lov tizimini joriy etish, aholining ayrim toifalari uchun imtiyozlar berish, shuningdek, kunlik, haftalik va oylik abonementlar imkoniyatlari o‘rganiladi.

Shavkat Mirziyoyev yirik shaharda jamoat transporti, ayniqsa, metropoliten infratuzilmaning muhim tarkibiy qismlaridan biri ekanini ta’kidladi. U bildirilgan takliflarni ma’qullab, ularni amalga oshirishni buyurdi.