Migratsiya agentligining sobiq xodimlari fuqarolarni Koreyaga noqonuniy yuborish uchun $90 mln olgan

Huquq-tartibot organlari tarkibida xususiy bandlik agentliklari rahbarlari bo‘lgan korrupsion tarmoqni fosh qildi

Фото: Департамент при Генпрокуратуре

O‘zbekistonda fuqarolarni noqonuniy ravishda Janubiy Koreyaga ishga yuborish bilan bog‘liq yirik jinoiy sxema fosh etildi. Bu haqda Bosh prokuratura huzuridagi Departament matbuot xizmati xabar berdi.

Tashkil etilgan guruh tarkibiga Tashqi mehnat migratsiyasi agentligining sobiq mansabdor shaxslari hamda xususiy bandlik agentliklari vakillari kirgan. Aniqlanishicha, gumonlanuvchilar 35 nafar fuqarodan noqonuniy ravishda $263,5 ming mablag‘ olgan.

Tergov ma’lumotlariga ko‘ra, guruh a’zolari rasmiy to‘lovlardan tashqari xorijga ishlash uchun ketmoqchi bo‘lgan fuqarolardan qo‘shimcha ravishda $7 mingdan $12 minggacha mablag‘ talab qilgan. Umumiy hisobda noqonuniy daromad hajmi qariyb $90 mlnni tashkil etgan.

Hozirgi vaqtda Janubiy Koreyada ish bilan ta’minlanmagan 600 nafardan ortiq fuqaroning murojaatlari ko‘rib chiqilmoqda. Yetkazilgan zarar miqdorini hisoblash va uni majburiy undirish ishlari olib borilmoqda.

Shuningdek, mutaxassislar 230 nafar fuqaroni xorijga yuborish va’dasi evaziga $580 ming mablag‘ olinganini aniqlagan. Bundan tashqari, xorijga chiqib ketgan ming nafar fuqarodan yana $5,6 mln mablag‘ olingan.

Mazkur epizodlar bo‘yicha gumonlanuvchilar jami $45 mln mablag‘ni o‘zlashtirgani qayd etilgan.

Holat yuzasidan jinoyat ishi qo‘zg‘atilgan va tergov harakatlari davom ettirilmoqda.