Markaziy bank banklarga kredit sug‘urta pullarini qaytarish tartibini ochiqlashni buyurdi

Markaziy bank tijorat banklarini onlayn mikrokreditlar muddatidan oldin so‘ndirilganda sug‘urta mukofotining bir qismini qaytarish tartibini batafsil tushuntirishga majbur qildi. Bu haqda regulyator matbuot xizmati xabar berdi.

Markaziy bank ijtimoiy tarmoqlarda internet orqali rasmiylashtiriladigan kreditlar bo‘yicha sug‘urta mablag‘larini ushlab qolish va qaytarish bilan bog‘liq muammolar yuzasidan tarqalgan murojaatlarni o‘rganishni boshladi.

Foydalanuvchilar muddatidan oldin kreditni yopganda foydalanilmagan davr uchun sug‘urta mablag‘lari qaytarilmayotgani yoki ushbu jarayon juda murakkab va shaffof emasligidan shikoyat qilgan.

Shu munosabat bilan Markaziy bank kredit tashkilotlariga chakana kredit mahsulotlari bo‘yicha batafsil ma’lumotlarni o‘z rasmiy veb-saytlari, ijtimoiy tarmoqlardagi sahifalari va mobil ilovalarida e’lon qilishni topshirdi.

Moliyaviy muassasalar sug‘urtaning majburiy yoki ixtiyoriy ekanini, sug‘urta badalini kim to‘lashi, hamkor sug‘urta kompaniyalari ro‘yxati hamda kredit muddatidan oldin so‘ndirilganda mablag‘larni qaytarish qoidalarini aniq ko‘rsatishi lozim.

Shuningdek, qaytarish mexanizmi ham tushuntirilishi kerak. Xususan, mablag‘ avtomatik tarzda qaytariladimi yoki buning uchun qarz oluvchi alohida murojaat qilishi zarurmi, qaytarish muddati, talab etiladigan hujjatlar va ariza topshirish tartibi batafsil bayon etilishi lozim.

Agar ijtimoiy tarmoqlarda tarqalgan shikoyatlar asossiz bo‘lsa, banklarga ularni sodda va tushunarli tilda izohlab, asosli rad javobini taqdim etish tavsiya etildi.

Aksincha, tizimda texnik nosozliklar yoki noqulayliklar mavjud bo‘lsa, moliyaviy muassasalar ularni ochiq tan olishi hamda muammolarni bartaraf etish bo‘yicha ko‘rilayotgan choralar va muddatlar haqida mijozlarni xabardor qilishi kerak. E’lon qilinadigan ma’lumotlar umumiy izohlar emas, balki amaliy foyda beruvchi tushuntirishlarni o‘z ichiga olishi lozim.

Banklar topshiriq ijrosi yuzasidan hisobot hamda e’lon qilingan materiallarga havolalarni 16-iyulga qadar Markaziy bankka taqdim etishi shart.