O‘zbekistonda mart oyida so‘m depozitlari stavkasi 18,1% gacha tushdi

2026-yil mart oyida O‘zbekistonda milliy valyutadagi depozitlar bo‘yicha o‘rtacha stavka pasayib, 18,1% ni tashkil etdi. Bu haqda Markaziy bank matbuot xizmati ma’lum qildi.

Qayd etilishicha, ushbu ko‘rsatkich fevral oyiga nisbatan 0,9% punktga, yillik hisobda esa 0,6 foiz punktga kamaygan. Qisqa muddatli depozitlar bo‘yicha stavkalar 16,3% gacha tushib, bir oyda 1,5% punktga pasaydi. Bir yildan ortiq muddatli omonatlar daromadliligi esa 18,9% ni tashkil etib, fevralga nisbatan 0,4% punktga kamaygan.

Aholi segmentida stavkalar nisbatan barqaror bo‘lib, banklar tomonidan 20,4–20,5% daromadlilik taklif qilinmoqda. Shu bilan birga, uzoq muddatli omonatlar bo‘yicha foizlar o‘tgan yilga nisbatan qariyb 2% punktga pasayganiga qaramay, inflyatsion kutilmalarni hisobga olgan holda real daromadlilik 8,5% ga yetdi. Bu ko‘rsatkich o‘tgan yil noyabridan buyon eng yuqori daraja hisoblanadi.

Yuridik shaxslar uchun depozit stavkalari keskin kamayib, o‘rtacha 15,5% ni tashkil etdi (−1,8% punkt). Bir yilgacha bo‘lgan omonatlar 14,6%, uzoq muddatli depozitlar esa 16,3% daromad keltirmoqda. Real stavkalar esa 4,4% gacha pasayib, o‘tgan bahordan beri eng past darajaga tushdi.

Xorijiy valyutadagi depozitlar bo‘yicha ham pasayish kuzatildi. O‘rtacha daromadlilik 3,5% ni tashkil etib, bir oyda 1% punktga kamaydi. Aholi uchun stavkalar 5% atrofida saqlanib qolgan bo‘lsa, biznes uchun 2,6% gacha tushdi. Uzoq muddatli valyuta depozitlari stavkalari esa deyarli ikki baravar kamayib, qisqa muddatli omonatlar darajasiga yaqinlashdi (2,7% va 2,3%).