Xitoy, Qirg‘iziston, O‘zbekiston va Turkmanistonni bog‘lovchi transport yo‘nalishi ishga tushirildi

Qashg‘ardan Xitoyni Qirg‘iziston, O‘zbekiston va Turkmaniston bilan bog‘lovchi yangi multimodal yuk yo‘nalishi ishga tushirildi. Bu haqda Dunyo axborot agentligi xabar berdi.

Yangi transport yo‘lagining maqsadi mavjud “Markaziy Osiyo – Xitoy” va “Xitoy – Yevropa” logistika yo‘nalishlariga muqobil yo‘l yaratish, shuningdek, “O‘rta koridor” orqali tranzit imkoniyatlarini kengaytirishdan iborat.

Birinchi yetti yuk avtomobili 15-oktabr kuni Qashg‘ardan jo‘nab chiqdi. Ularning 21-oktabr kuni O‘zbekistonga, 24-oktabr kuni esa Turkmanistonga yetib borishi kutilmoqda. Turkmanistondan ayrim yuklar Ozarbayjonga yuboriladi.

Xitoy Transport vazirligi vakili Tsay Tuanjzening ta’kidlashicha, loyiha davlat rahbarlarining hamkorlikni mustahkamlashga bo‘lgan intilishini aks ettiradi. Uning so‘zlariga ko‘ra, ushbu yo‘nalish ishtirokchi mamlakatlar iqtisodiyotiga ijobiy ta’sir ko‘rsatadi, o‘zaro yuk tashish hajmini oshiradi va “Bir makon, bir yo‘l” tashabbusini amalga oshirishga xizmat qiladi.

Shuningdek, u yangi marshrut Yevropa, Janubiy Osiyo va Yaqin Sharq bozorlariga chiqish imkoniyatlarini kengaytirishini ta’kidladi.