OTB O‘zbekistonga elektr tarmoqlarini modernizatsiya qilish uchun $200 mln ajratadi

Osiyo taraqqiyot banki (OTB) O‘zbekistondagi taqsimlovchi elektr tarmoqlarini modernizatsiya qilish uchun $200 mln ajratadi. Bu haqda bank matbuot xizmati xabar berdi.

Mablag‘lar mamlakat bo‘ylab 60 ta muhim elektr podstansiyasini rekonstruksiya qilish va modernizatsiyalash, shuningdek, elektr tarmoqlarini boshqarishning raqamli tizimlarini joriy etishga yo‘naltiriladi.

Dastur elektr energiyasi yo‘qotishlarini kamaytirish, transformatorlarga tushadigan yuklamani pasaytirish va elektr ta’minoti ishonchliligini oshirishga qaratilgan. Infratuzilmani yangilash zarurati iqtisodiy o‘sish, shaharlarning kengayishi va elektr energiyasiga talab ortib borayotgani bilan izohlanadi.

Modernizatsiya natijasida qayta tiklanuvchi energiya manbalari hisobiga kamida 3,3 GVt quvvatni tarmoqqa ulash uchun sharoit yaratilishi kutilmoqda. Bundan tashqari, issiqxona gazlari chiqindilarini yiliga CO₂ ekvivalentida qariyb 23 ming tonnaga kamaytirish rejalashtirilgan.

Kredit ajratish to‘g‘risidagi bitimni OTB prezidenti Masato Kanda va O‘zbekiston bosh vazirining o‘rinbosari Jamshid Qo‘chqorov imzoladi.

Loyiha OTBning O‘zbekiston energetika sektorida Jahon banki bilan o‘zaro ishonch mexanizmi doirasida amalga oshiriladigan birinchi dasturi bo‘ladi. Shuningdek, u mamlakat energetika sohasida natijalarga asoslangan moliyalashtirish bo‘yicha ilk dastur hisoblanadi.

OTB loyiha uchun asosiy kreditor sifatida ishtirok etadi. Jahon banki oktabr oyida direktorlar kengashiga qo‘shimcha $100 mln miqdorida moliyalashtirish ajratish bo‘yicha taklif kiritishni rejalashtirmoqda.

Infratuzilmani modernizatsiya qilishdan tashqari, dastur elektr energiyasini uzatish bo‘yicha milliy kompaniyaning tarmoqlardan foydalanish, boshqaruv va moliyaviy nazorat sohalaridagi salohiyatini mustahkamlashni ham nazarda tutadi. Shuningdek, xodimlarni o‘qitish va ayollarning energetika sohasidagi ishtirokini kengaytirish rejalashtirilgan.