O‘zbekistonda mahalliy maishiy texnika xaridi uchun 18% li kreditlar ajratilishi mumkin

9-noyabr kuni O‘zbekiston prezidenti Shavkat Mirziyoyev elektrotexnika sanoati vakillari, tadbirkorlar hamda investorlar bilan uchrashuvda mahalliy maishiy texnika savdosini rag‘batlantirishning yangi mexanizmini taklif qildi. Bu haqda davlat rahbari matbuot kotibi Sherzod Asadov xabar berdi.

Taklifga ko‘ra, tijorat banklari O‘zbekistonda ishlab chiqarilgan muzlatkich, kir yuvish mashinalari, konditsioner va boshqa turdagi maishiy texnikalar xaridi uchun yillik 18% stavkada iste’mol kreditlari ajratadi.

Yig‘ilishda ta’kidlanganidek, yangi mexanizm, bir tomondan, oilalarning zamonaviy maishiy texnika xarid qilish imkoniyatlarini kengaytirish, ikkinchi tomondan, mahalliy korxonalar mahsulotlari sotuvini oshirishga xizmat qilishi kerak.

Prezident mutasaddilarga ikki hafta ichida tegishli hisob-kitoblarni tayyorlab, dasturni amalga oshirish uchun tijorat banklariga arzon moliyaviy resurslarni joylashtirish bo‘yicha aniq takliflar kiritishni topshirdi.

Shu bilan birga, banklar mablag‘larni aynan qaysi manbalar hisobidan olishi, kreditlarning eng yuqori miqdori va muddatlari, shuningdek, qarz oluvchilarga qo‘yiladigan talablar aniqlashtirilmagan. Dasturni ishga tushirish muddatlari ham ma’lum qilinmagan.

Taqqoslash uchun, Markaziy bank ma’lumotlariga ko‘ra, 2026-yil avgust oyida jismoniy shaxslarga milliy valyutada ajratilgan kreditlar bo‘yicha o‘rtacha tortilgan foiz stavkasi yillik 21,3% ni tashkil etgan. Bu ko‘rsatkich kreditlarning har xil turlarini qamrab olgani sababli taklif etilayotgan dasturga to‘g‘ridan-to‘g‘ri qiyoslash uchun mos emas.

Yig‘ilishda, shuningdek, so‘nggi 10 yilda O‘zbekiston elektrotexnika sanoatiga $2 mlrd investitsiya jalb etilgani va 413 ta yangi ishlab chiqarish quvvati ishga tushirilgani ma’lum qilindi.

2026-yilda tarmoqda ishlab chiqarish hajmi 50 trln so‘mga yetgan. 2016-yilda bu ko‘rsatkich 1,7 trln so‘mni tashkil etgan. Elektrotexnika mahsulotlari eksporti $1,6 mlrdga yetdi.

Kelgusi uch yilda maishiy texnika sohasida umumiy qiymati 600 mln dollar bo‘lgan yana 19 ta investitsiya loyihasini amalga oshirish rejalashtirilmoqda.