Polsha kompaniyasi “LPP” O‘zbekiston bozoriga kirishni rejalashtirmoqda

Polshaning yirik kiyim-kechak giganti “LPP” guruhi o‘zining mashhur brendi “Sinsay” orqali O‘zbekistonda faoliyat boshlashga tayyorlanmoqda.

Kompaniya 2025-yil avgust oyida birinchi “Sinsay” do‘konini ochadi, yil yakuniga qadar esa mamlakat bo‘ylab 20 dan ortiq yangi savdo nuqtalarini ishga tushirishni rejalashtirgan.

Bu “LPP” guruhining Markaziy Osiyodagi kengayish strategiyasining bir qismi bo‘lib, kompaniya faqat katta shaharlarda emas, balki kichik shaharlar va aholi yashash massivlarida ham do‘konlar ochishni maqsad qilgan — bu esa brendni aholiga yanada yaqinlashtiradi.

“LPP” guruhi vitse-prezidenti Marcin Bójko taʼkidlashicha, mintaqaga kirish qarori mahalliy ehtiyojlar va bozordagi salohiyatni chuqur tahlil qilish asosida qabul qilingan. “Sinsay” brendi zamonaviy, amaliy va hamyonbop narxdagi kiyimlar orqali mahalliy xaridorlar ehtiyojiga javob bermoqchi.

Shuningdek, “LPP” guruhi 2025-yilning uchinchi choragida “Sinsay”ni Ozarbayjon va Gruziya, 2026-yilda esa Moldova bozoriga olib chiqishni rejalashtirgan. Bugungi kunga kelib, kompaniya butun dunyo bo‘ylab 2, 8 mingdan ortiq do‘konga ega bo‘lib, shulardan 1,6 mingga yaqini “Sinsay” brendiga tegishli.