Davlat xaridlari ishtirokchilari assotsiatsiyasi va Ledokol Group hamkorlik qiladi

Davlat xaridlari ishtirokchilari assotsiatsiyasi va reklama xoldingi Ledokol Group kasbiy kompetensiyalarni rivojlantirish hamda xarid jarayonlari shaffofligini oshirish bo‘yicha hamkorlik qilishga kelishib oldi.

Hamkorlik Ledokol Group kompaniyasining O‘zbekistonda reklama bozorida shaffof xaridlar madaniyatini rivojlantirishga qaratilgan tashabbusining davomi hisoblanadi.

Avvalroq xolding reklama bozorida birinchi bo‘lib “Marketingda shaffof xaridlar: ideal tender anatomiyasi” mavzusida ixtisoslashtirilgan tadbir o‘tkazgan. Unda marketing va xaridlar sohasi vakillari bir maydonga jamlanib, tender jarayonlarining sifati va samaradorligi yuzasidan ochiq muloqot qilgan.

Endilikda ushbu tashabbus Davlat xaridlari ishtirokchilari assotsiatsiyasi bilan hamkorlikda davom ettiriladi.

Davlat xaridlari ishtirokchilari assotsiatsiyasi raisi Anvar Muxitdinov:

Ledokol Group bilan hamkorlik biz uchun tajribalarni birlashtirish, marketing va PR sohasida xaridlarning shaffofligini oshirish hamda professional standartlarni rivojlantirish bo‘yicha birgalikda ishlash imkoniyatidir.

Biz xalqaro ilg‘or tajribalarni o‘rganish va joriy etish, xaridlar ishtirokchilari doirasini kengaytirish hamda yanada ochiq va samarali raqobat uchun sharoit yaratishni rejalashtirmoqdamiz. Alohida yo‘nalishlardan biri ta’limiy tashabbuslarni rivojlantirish bo‘ladi. Jumladan, davlat xaridlari sohasida jurnalistik surishtiruvlar olib borayotgan jurnalistlar uchun ham tegishli imkoniyatlar yaratiladi.

Ishonchim komilki, hamkorligimiz sohada yangi muhim loyihalar va ijobiy o‘zgarishlar uchun asos bo‘ladi.

Assotsiatsiya uchun Ledokol Group bilan hamkorlik xaridlar sohasidagi ekspertizani O‘zbekiston reklama bozorining yetakchi ishtirokchilaridan birining ko‘p yillik amaliy tajribasi bilan birlashtirish imkonini beradi.

Tomonlar mutaxassislar malakasini oshirish va amaliy tajriba almashishga qaratilgan ta’limiy tadbirlar, tadqiqotlar hamda ekspert muhokamalarini o‘tkazishni rejalashtirmoqda.

Ledokol Group direktori va asoschisi Dilshod Muzaffarov:

Davlat xaridlari ishtirokchilari assotsiatsiyasi bilan hamkorligimiz biz tanlagan yo‘nalishning to‘g‘riligini yana bir bor tasdiqlaydi. Biz bozor mutaxassislarining halolligi, shaffofligi va malakasini oshirish tarafdorimiz. O‘tkazgan tadbirimiz marketing va xaridlar sohasi o‘rtasidagi ochiq muloqotga talab yuqori ekanini ko‘rsatdi. Endi bu yo‘nalishni yanada rivojlantirishga tayyormiz.

Hamkorlik Ledokol Group kompaniyasining reklama sohasida professional standartlar va shaffof xaridlar madaniyatini rivojlantirish bo‘yicha tizimli ishlarining navbatdagi bosqichi bo‘ladi.