“Kvars” yana davlat tasarrufiga o‘tdi: “Quvasoysement” bilan tuzilgan shartnoma bekor qilindi

O‘zbekistonda shisha mahsulotlari ishlab chiqaruvchi “Kvars” kompaniyasi aksiyalarining nazorat paketiga yana davlat egalik qilmoqda. Bu haqda Korporativ axborot yagona portalidan ma’lum qilindi.

Hujjatga muvofiq, endilikda Davaktiv agentligi “Kvars” aksiyalarining 89,78% qismiga egalik qiladi. Ushbu ulush 2023-yil fevral oyida “Quvasoysement” kompaniyasiga 265 mlrd so‘mga sotilgan bo‘lib, bitim zavodning 47,2 mln yevrolik qarz majburiyatlarini so‘ndirishni o‘z ichiga olgan.

Biroq moliyaviy qiyinchiliklar tufayli “Quvasoysement” tomonlarning roziligi bilan bitimni bekor qilishni so‘rab Davaktiv agentligiga murojaat qilgan. 2025-yil 14-fevralda shartnoma rasman bekor qilindi. Natijada “Kvars” kuzatuv kengashi qayta ko‘rib chiqilib, uning tarkibiga Davaktiv agentligi vakillari kiritildi.

“Kvars” O‘zbekiston va Markaziy Osiyoda avtomobil sanoati uchun shisha idishlar va shisha, o‘tga chidamli materiallar, butilkalar, sayqallangan va toblangan shisha, rangli shisha (yashil, kulrang va bronza) ishlab chiqarish bo‘yicha yetakchi hisoblanadi.