MB kredit uchun kartalardan avtomatik pul yechishga cheklov kiritadi

Markaziy bank fuqarolarning bank kartalaridan kreditlarni so‘ndirish uchun avtomatik pul yechishga cheklov kiritdi. Tegishli qaror Lex.uz saytida e’lon qilindi.

Hujjat bilan tijorat banklarining mijozlar bilan o‘zaro munosabatlariga qo‘yiladigan minimal talablar to‘g‘risidagi nizomga o‘zgartirishlar kiritilmoqda. Unga ko‘ra, kredit yoki kafillik bo‘yicha to‘lov yechib olinganidan keyin mijoz hisobida saqlanib qolishi kerak bo‘lgan eng kam mablag‘ miqdori belgilanadi.

Banklarga mijozning barcha bank kartalaridagi jami qoldiq mehnatga haq to‘lashning eng kam miqdorining 50 foizidan kam bo‘lib qoladigan holatda uning roziligisiz mablag‘ yechish taqiqlanadi. Hozirda bu miqdor 680 ming so‘mni tashkil etadi.

O‘zgartirishlar hujjat e’lon qilinganidan uch oy o‘tib — 2027-yil 10-yanvardan kuchga kiradi.

Avvalroq Raqobat qo‘mitasi Markaziy bankka kreditlarni muddatidan oldin so‘ndirish imkoniyatini qonunchilik bilan tartibga solishni taklif qilgani haqida xabar berilgandi.