O‘zbekistonlik Kraken Express studiyasi o‘yindan 6 kunda $13 mln ishlab topdi

O‘zbekistonning Kraken Express o‘yin studiyasi Steam platformasida taqdim etilgan Windrose loyihasi orqali dastlabki 6 kun ichida $13 mln dan ortiq daromad oldi. Bu haqda ishlab chiquvchilar Steam’dagi sahifasida ma’lum qildi.

Studiyaga ko‘ra, o‘yin qisqa vaqt ichida 1 mln nusxada sotilgan. Shu bilan birga, bir vaqtning o‘zida o‘yinda 200 mingdan ortiq foydalanuvchi ishtirok etgani qayd etilgan.

Ishlab chiquvchilar jamoasi foydalanuvchilarning fikr-mulohazalari asosida texnik yaxshilashlar ustida ishlayotganini bildirdi. Fikrlar va translyatsiyalarni monitoring qilish orqali o‘yinning funksionalligi muntazam takomillashtirib borilmoqda.

Windrose o‘yinining narxi $14,49 etib belgilangan bo‘lib, 21-aprelga qadar 10% lik chegirma amal qiladi. Steam platformasida loyiha foydalanuvchilar tomonidan “juda ijobiy” baholangan. O‘yinchilar, ayniqsa, grafika, geympley va jang tizimini yuqori baholagan.

Mazkur loyiha ochiq dunyoga ega PvE sarguzasht o‘yini bo‘lib, unda qurilish, crafting va omon qolish elementlari mavjud. Foydalanuvchilar turli biomlarni o‘rganadi, kemalarni boshqaradi hamda dengiz va quruqlikdagi janglarda ishtirok etadi. Shuningdek, o‘yinda 8 nafargacha bo‘lgan guruhlar uchun kooperativ rejim ham joriy qilingan.