O‘zbekistonda 442,4 mingta korxona va tashkilotlar faoliyat yuritmoqda  

2025-yil 1-aprel holatiga, O‘zbekistonda faoliyat ko‘rsatayotgan korxona va tashkilotlar soni 442,4 mingtani tashkil etgan. Bu haqda Milliy statistika qo‘mitasi ma’lum qildi.

Shundan 372,9 mingtasi yoki 84,3% qismi kichik korxona va mikrofirmalar hissasiga to‘g‘ri keladi.

Hududlar bo‘yicha eng ko‘p faoliyat ko‘rsatayotgan korxona va tashkilotlar Toshkent shahrida – 22,6%, Toshkent – 9,6%, Samarqand – 8,8%, Farg‘ona – 8,1% va Qashqadaryo viloyatida – 6,5% faoliyat ko‘rsatmoqda.

2025-yil 1-aprel holatiga faoliyat yuritayotgan korxona va tashkilotlarning iqtisodiy faoliyat turlari bo‘yicha eng ko‘p qismi “savdo” tarmog‘ida bo‘lib, uning jami sonidagi ulushi 32,6% ni tashkil etdi.

Xorijiy investitsiyalar ishtirokida faoliyat ko‘rsatayotgan korxonalarning soni, 2024-yilning mos davriga nisbatan 1,5 mingtaga oshgan. 

Bu asosan, savdo sohasidagi korxonalar sonining 5,05 mingtadan 5,6 mingtaga, (o‘sish 630 taga), axborot va aloqa sohasida 917 tadan 1,1 mingtaga (o‘sish 214 taga) va qurilish sohasida 956 tadan 1,1 mingtaga (o‘sish 190 taga) ko‘payishi bilan bog‘liq.