O‘zbekiston va Afg‘oniston Kobulda qo‘shma logistika korxona tashkil qildi

O‘zbekistonning Sogdiana Trans kompaniyasi Kobul shahrida Afg‘onistonning Khan Daqiq Trading kompaniyasi bilan hamkorlikda o‘z vakolatxonasini ochdi, deb xabar qilmoqda “Dunyo” axborot agentligi.

Sogdiana Trans 2011-yildan beri O‘zbekistonda faoliyat yuritib kelmoqda. Kompaniya ma’lumotlariga ko‘ra, qo‘shma korxona afg‘on tadbirkorlariga transport logistikasi sohasida ko‘mak ko‘rsatadi.

Bu qadam kompaniya faoliyatini kengaytirishdagi muhim bosqich bo‘lib, Yevropa, MDH, Afg‘oniston va Pokistonni bog‘laydigan yangi yo‘nalishlarni rivojlantirishga bo‘lgan intilishni namoyon etdi. Kobulda vakolatxonaning ochilishi kompaniya va uning mijozlari uchun bir qator afzalliklarni taqdim etadi. Eng avvalo, bu logistika jarayonlarini soddalashtirish va yuklarni yetkazib berish muddatlarini tezlashtirish imkonini beradi, — deyiladi kompaniya xabarida.

Khan Daqiq Trading kompaniyasi rahbari Hamid Xon ochilish marosimidagi nutqida yiliga 150 ming tonna mahsulotni Kobul — Mozori-Sharif — Kobul yo‘nalishida yuk mashinalarda, Mozori-Sharifdan O‘zbekiston, Qozog‘iston, Belarus, Rossiya, Boltiq bo‘yi mamlakatlariga temir yo‘l orqali yetkazish va u yerdan import mahsulotlarini olib kelish imkoniyati borligini ma’lum qildi.

O‘zbekistonning Afg‘onistondagi elchisi Oybek Usmonov tashkil etilgan qo‘shma korxonaning O‘zbekiston va Afg‘oniston o‘rtasida transport, logistika, savdo, sanoat va boshqa yo‘nalishlardagi hamkorlikni kengaytirish uchun muhim ahamiyatga ega ekanligini ta’kidladi.