Iyun oyida O‘zbekistonda 105 ta tovar va xizmatlar narxi 10% ga oshdi

Joriy yil iyun holatiga ko‘ra, O‘zbekistonda 105 ta tovar va xizmatlar narxi 10% dan ziyodga o‘sdi. Bu haqdagi maʼlumot Markaziy bank taqdim etgan infografikada qayd etilgan.

Tahlilda 2025-yil iyunda mamlakatda yillik inflyatsiya darajasi 8,7% ekani keltirilgan. Narxlari 10% dan yuqori o‘sgan tovar va xizmatlar ulushi 21% ni tashkil etgan.

Oziq-ovqat mahsulotlaridan paxta yog‘ining narxi eng yuqori darajada o‘sgan — 43,5%. Shu bilan birga, kartoshka (36,5%) va karam (37,4%) qiymati nisbatan ko‘proq oshgan.

Qo‘y (32%) va mol (30,5%) go‘shtlari hamda kungaboqar yog‘i (28,9%) ham 20% dan ortiq qimmatlashgan.

Nooziq-ovqat mahsulotlaridan metan narxi eng yuqori darajada oshgan. O‘tgan oydagi ko‘rsatkichlarga ko‘ra, mazkur turdagi gaz qariyb 36,2% ga qimmatlashgan.

O‘z navbatida quyidagi mahsulotlar narxlari ham o‘rtacha inflyatsiyadan yuqori darajada oshgan:

• Vitaminlar — 12,5%;
• Antibiotiklar — 11,8%;
• Antigistamin preparatlar — 11,8%;
• Propan — 11,3%;
• Atir sovun — 10,3%.

Markaziy bank qolgan, narxi 10% da yuqori o‘sgan 93 ta tovar va xizmat haqida axborot bermagan. Xususan, oxirgi 18 oyda xizmatlar eng yuqori darajada o‘sayotganiga qaramay, tahlilda 10% dan ko‘pga qimmatlagan bironta xizmat nomi keltirilmagan.