UZBEKENERGOTAMIR Toshkentda yangi “Iyk ota” podstansiyasini qurib bitkazdi

Toshkent shahrining Bektemir tumanida 110/35/10 kV kuchlanishli yangi “Iyk ota” podstansiyasi foydalanishga topshirildi. Poytaxt energetika infratuzilmasini rivojlantirish va modernizatsiya qilish doirasida amalga oshirilgan mazkur obyekt bo‘yicha qurilish-montaj ishlarining to‘liq majmuasi UZBEKENERGOTAMIR mutaxassislari tomonidan bajarildi.

Yangi podstansiya elektr tarmoqlarining o‘tkazuvchanlik qobiliyatini oshirish, qo‘shimcha quvvat zaxirasini yaratish va ortib borayotgan yuklamalar sharoitida elektr ta’minoti barqarorligini ta’minlash imkonini beradi. Shuningdek, obyekt amaldagi iste’molchilarni ishonchli energiya bilan ta’minlashga xizmat qiladi hamda Bektemir tumanining kelgusidagi rivoji uchun zarur energetik salohiyatni yaratadi.

Tantanali ochilish marosimida Bektemir tumani hokimi Nurilla Abdurahmanov, hokim o‘rinbosari Jasur Umarov, “O‘zbekiston milliy elektr tarmoqlari” AJ boshqaruvi raisining ekspluatatsiya masalalari bo‘yicha birinchi o‘rinbosari Boburjon Murodov, shuningdek, loyihani amalga oshirishda bevosita ishtirok etgan mutaxassislar qatnashdi.

“Iyk ota” podstansiyasining foydalanishga topshirilishi O‘zbekiston Respublikasi davlat mustaqilligining 35 yilligiga munosib sovg‘a bo‘lib, aholi farovonligini oshirish va zamonaviy energetika infratuzilmasini rivojlantirishga qaratilgan keng ko‘lamli islohotlarning amaliy natijalaridan biri bo‘ldi.

Loyihaning muvaffaqiyatli amalga oshirilishi UZBEKENERGOTAMIR kompaniyasining zamonaviy energetika obyektlarini qurish va kompleks qurilish-montaj ishlarini bajarish borasidagi yuqori muhandislik va texnik salohiyatini yana bir bor namoyon etdi.

Zamonaviy texnik yechimlar va ko‘p yillik amaliy tajribaga tayangan holda, UZBEKENERGOTAMIR O‘zbekistonning ishonchli va barqaror energetika infratuzilmasini rivojlantirishga qaratilgan yirik loyihalarni amalga oshirishda davom etmoqda.

Reklama huquqlari asosida