IT Park Ventures beshta startapga $1,5 mlndan ortiq sarmoya kiritdi

Loyihalar fintech, korporativ salomatlik, sanoat xavfsizligi va onlayn oziq-ovqat yetkazib berish xizmatlari sohalarida amalga oshiriladi

Фото: IT Park Ventures

24-25-iyun kunlari Samarqandda O‘zbekiston va Fors ko‘rfazi mamlakatlari o‘rtasidagi raqamli hamkorlik masalalariga bag‘ishlangan GCC-Uzbekistan Digital & Tech Forumi bo‘lib o‘tdi.

Tadbir doirasida IT Park Ventures jamg‘armasi beshta startapga sarmoya kiritishini e’lon qildi.

FlexSoft $1 mln miqdorida mablag‘ oldi. Kompaniya lombardlar va mikromoliyaviy tashkilotlar uchun moliyaviy xizmatlarni avtomatlashtirish va raqamlashtirishga mo‘ljallangan dasturiy ta’minotni ishlab chiqmoqda.

Push30 IT Park Ventures’dan $300 ming va White Hill Capital’dan qo‘shimcha $300 ming mablag‘ jalb qildi. Startap korporativ sog‘liqni saqlash dasturlarini ilgari surmoqda hamda O‘zbekiston va Ozarbayjon bozorlarida faoliyat yuritmoqda. BAA va Saudiya Arabistonida ishga tushirish bo‘yicha tayyorgarlik ishlari olib borilmoqda.

Cradle Vision Tech $110 ming oldi. Startap sun’iy intellektdan foydalangan holda sanoat xavfsizligi yechimlarini ishlab chiqish bilan shug‘ullanadi. U yaqinda Plug and Play xalqaro akseleratsiya dasturiga qo‘shildi.

BITO ERP — $100 ming evaziga mahalliy xususiyatlarni hisobga olgan holda biznesni boshqarish vositalarini taklif etadi. Loyiha Murod Abdurahmonovning murabbiyligi ostida amalga oshirilmoqda.

Coozin — $50 ming evaziga u uy taomlarini yetkazib berish, pazandalikni o‘rgatish va xususiy oshpazlarni qo‘llab-quvvatlash uchun onlayn xizmat yaratadi.

Ushbu investitsiyalardan so‘ng IT Park Ventures portfelidagi loyihalar soni sakkiztagacha ko‘paydi.