Ipotekani qayta moliyalashtirish kompaniyasi 700 mlrd so‘mlik obligatsiyalar chiqardi

O‘zbekiston Ipotekani qayta moliyalashtirish kompaniyasi “Toshkent” Respublika fond birjasida obligatsiyalarning to‘qqizinchi emissiyasini amalga oshirdi. Bu haqda savdo maydonchasi matbuot xizmati xabar berdi.

Yangi emissiya UZ6056887AI4 kodi bilan ro‘yxatdan o‘tgan bo‘lib, davlat kompaniyasi uchun to‘qqizinchi obligatsiyalar chiqarilishi hisoblanadi.

Obligatsiyalar savdosi 30-iyun, bugundan boshlanadi. Kompaniya 700 ming dona obligatsiya chiqargan bo‘lib, ularning har biri 1 mln so‘m nominal qiymatga ega. Emissiyaning umumiy hajmi 700 mlrd so‘mni tashkil etadi. Bu kompaniya tarixidagi eng yirik bir martalik obligatsiya chiqarilishi hisoblanadi.

Qimmatli qog‘ozlar bo‘yicha yillik daromadlilik 16,5% etib belgilangan. Kupon to‘lovlari har uch oyda amalga oshiriladi. Obligatsiyalar muomala muddati 2555 kun yoki qariyb yetti yilni tashkil qiladi.

Joriy oy boshida Istiqbolli loyihalar milliy agentligi bunday qimmatli qog‘ozlarning ilk 40,5 mlrd so‘mlik emissiyasini ro‘yxatdan o‘tkazgandi.