Etihad Airways 17-avgustdan Toshkent — Abu-Dabi reyslarini yo‘lga qo‘yadi

BAAning Etihad Airways aviakompaniyasi 2026-yil 17-avgustdan Toshkent va Abu-Dabi o‘rtasida muntazam aviaqatnovlarni yo‘lga qo‘yadi. Bu haqda Transport vazirligi matbuot xizmati ma’lum qildi.

Qaror O‘zbekiston transport vaziri o‘rinbosari Jasurbek Choriyev va Etihad Airways operatsion direktori Majed Al-Marzuqi o‘rtasidagi muzokaralar yakunida qabul qilingan. Tomonlar ikki mamlakat o‘rtasidagi aviaaloqalarni rivojlantirish istiqbollarini muhokama qilgan.

Kelishuvga ko‘ra, reyslar Toshkent — Abu-Dabi — Toshkent yo‘nalishi bo‘yicha amalga oshiriladi. Shuningdek, aviakompaniya kelgusida parvozlar geografiyasini bosqichma-bosqich kengaytirishni rejalashtirmoqda.

Bundan tashqari, Etihad Airways va Uzbekistan Airways o‘rtasida kod-shering va interlayn hamkorlikni yo‘lga qo‘yish bo‘yicha muzokaralar olib borilmoqda. Bu yo‘lovchilarga bir nechta parvozlarni yagona chipta asosida amalga oshirish imkonini beradi.

Yangi yo‘nalish orqali o‘zbekistonlik yo‘lovchilar Abu-Dabi orqali 70 dan ortiq xalqaro manzilga, jumladan Shimoliy Amerika, Yevropa, Osiyo, Afrika va Avstraliyaga tranzit parvozlarni amalga oshirishi mumkin bo‘ladi.