Apple eski iPhone modellari narxini ham $100 ga oshirdi

Apple kompaniyasi bu hafta yangi iPhone modellarini taqdim etish bilan birga, o‘z qatoridagi avvalgi smartfonlarning narxlarini ham oshirdi. MacRumors xabariga ko‘ra, kompaniya iPhone 16, iPhone 17, iPhone Air va iPhone 17e modellarining narxini $100 ga ko‘tardi.

Yangi narxlar Apple’ning “Surprise and Shine” tadbiri o‘tkazilgan kunning o‘zida kuchga kirdi. iPhone 16’ning boshlang‘ich narxi avvalgi $699dan $799ga, iPhone 17e narxi $599dan $699ga, standart iPhone 17 narxi esa $799dan $899ga oshdi. iPhone Air narxi $999dan $1099ga ko‘tarilib, ilk bor to‘rt xonali ko‘rsatkichga yetdi.

Ushbu to‘rtta modelning hech biriga narx oshirilishi bilan birga apparat jihatidan o‘zgarish kiritilmadi. Apple shu tadbirda iPhone 17 Pro va iPhone 17 Pro Max modellarini ham ishlab chiqarishdan chiqarishini e’lon qildi. Ularning o‘rnini yangi iPhone 18 Pro modellari egalladi.

Apple narxlarning oshirilishiga komponentlar narxining ko‘tarilishini sabab sifatida ko‘rsatmoqda. Kompaniya bosh direktori Tim Kuk so‘nggi oylarda bu haqda bir necha bor ta’kidlagan. U iyun oyida The Wall Street Journal nashriga Apple yuqori talab sabab xotira va ma’lumot saqlash chiplarining oshib borayotgan xarajatlarini to‘liq qoplay olmayotganini bildirgan.

Kapital.uz avvalroq Apple’ning 9-sentabrdagi taqdimotida $2000 qiymatidagi buklanadigan iPhone Duo’ni taqdim etgani haqida xabar bergandi.