O‘zbekistonda avtoturargohlarga elektromobil quvvatlash stansiyalarini o‘rnatish talablari yangilandi

O‘zbekistonda elektromobillar uchun quvvatlash qurilmalarini o‘rnatish hamda avtomobillarni saqlash joylariga qo‘yiladigan talablar yangilandi. Tegishli o‘zgartirishlar Qurilish va uy-joy kommunal xo‘jaligi vazirligining buyrug‘i bilan tasdiqlanib, Lex.uz portalida e’lon qilindi.

Yangilangan qurilish me’yorlariga ko‘ra, avtoturargohlarda mototsikl, moped, skuter va velosipedlar uchun alohida joylar majburiy tartibda ajratiladi. Ular maxsus yo‘l belgilari bilan ko‘rsatilishi kerak.

Elektromobil quvvatlash stansiyalarini qayerga o‘rnatish mumkin?

Elektromobil va gibrid avtomobillar uchun quvvatlash qurilmalarini faqat ochiq maydonlarda, yer usti avtoturargohlarining birinchi qavatlarida yoki yer osti avtoturargohlarining eng yuqori — -1 qavatida o‘rnatishga ruxsat beriladi.

Avvalgi tahrirda bunday qurilmalarni ko‘p qavatli avtoturargohlarning yuqori qavatlariga o‘rnatishga ham ruxsat berilgan edi.

Bunda quvvatlash uskunalari bino tashqi devorlariga yaqin joylashtirilishi haqidagi talab saqlab qolingan.

Quvvatlash qurilmalari o‘rnatiladigan yopiq avtoturargohlar konstruktiv yong‘in xavfi bo‘yicha C0 yoki C1 sinfiga mos kelishi kerak.

Agar avtoturargoh tutunga qarshi shamollatish tizimi bilan jihozlangan bo‘lsa, uning hisoblangan quvvati yong‘in vaqtida 8 MVt issiqlik ajralishini hisobga olgan holda belgilanadi.

Avtoturargohlarga boshqa talablar ham joriy etildi

Turistik obyektlar yaqinidagi avtoturargohlarning sig‘imi endi turizm mavsumidagi eng yuqori transport yuklamasini hisobga olgan holda aniqlanadi.

Ko‘p qavatli avtoturargohlarda qo‘shimcha xavfsizlik talablari belgilandi. Ochiq qavatlar balandligi kamida 1,2 metr bo‘lgan himoya to‘siqlari bilan jihozlanishi kerak.

Shuningdek, mashina joyidan eng yaqin evakuatsiya chiqishigacha bo‘lgan maksimal masofa ham belgilandi. Yer osti avtoturargohlarida chiqishlar orasidagi masofa 40 metrdan, yer usti avtoturargohlarida esa 60 metrdan oshmasligi lozim.

Burchakdagi mashina joylari uchun ushbu masofa mos ravishda 20 va 25 metr etib belgilangan.