O‘zbekiston va Qozog’iston chegarasida quriladigan sanoat kooperatsiyasi markazi loyihasi ma’qullandi

Qozog’iston Parlamenti Majlisi deputatlari “Qozog’iston Respublikasi Hukumati va O‘zbekiston Respublikasi Hukumati o‘rtasida “Markaziy Osiyo” sanoat kooperatsiyasi xalqaro markazi faoliyatini tartibga solish to‘g’risidagi Bitimni ratifikatsiya qilish haqida”gi qonun loyihasini ma’qulladi. Bu haqda “Kazinform” xalqaro axborot agentligi ma’lum qilmoqda. 

Markaz “Atameken” (Qozog’iston) va “Guliston” (O’zbekiston) nazorat-o‘tkazish punktlari yaqinida joylashgan bo‘lib, ishlab chiqarish maydonlari, omborlar, shuningdek, transport infratuzilmasini o‘z ichiga oladi. 

Bu yuk tashishni tezlashtirib, logistika xarajatlarini kamaytiradi. Shu bilan birgalikda iste’molchilar uchun mahsulotning yakuniy tannarxini pasayadi. Loyiha “Shimol-Janub” yo‘lagi doirasida ishlab chiqarish kooperatsiyasini rivojlantiradi.

Obyektning umumiy maydoni 100 gektarni tashkil etadi, shundan 50 gektar Qozog’iston, 50 gektar O’zbekiston hududiga to‘g’ri keladi. Muayyan hududga mintaqaviy sanoat zonasi maqomi beriladi.

“Kazinform” XAA manbasida ta’kidlanishicha, markaz infratuzilmasi byudjetdan tashqari mablag’lar hisobidan barpo etiladi.