ChatGPT dasturchi kompaniyasi O‘zbekistonda soliq to‘lovchi sifatida ro‘yxatdan o‘tdi

Aprel oyining boshidan boshlab uchta xorijiy internet-kompaniya O‘zbekistonda qo‘shilgan qiymat solig‘i (QQS) to‘lovchisi sifatida ro‘yxatdan o‘tdi, deya xabar bermoqda Soliq qo‘mitasining rasmiy sayti.

Ular orasida 2025-yil 8-aprel kuni ro‘yxatdan o‘tgan OpenAI LLC — ChatGPT chat-boti va Sora video generatori yaratuvchisi mavjud. Undan bir kun oldin, 7-aprel kuni, AQSHning DigitalOcean bulutli xizmati soliq hisobiga qo‘yildi.

Shuningdek, 4-aprel kuni Rossiyaning onlayn kinoteatri ivi.ru (OOO “Ivi.ru”) ham O‘zbekistonda soliq to‘lovchi sifatida ro‘yxatdan o‘tdi.

Hozirgi vaqtda mamlakatda 67 ta xorijiy internet-kompaniya ro‘yxatdan o‘tgan bo‘lib, ularning yettitasi 2025-yil boshidan buyon ushbu ro‘yxatga qo‘shilgan. Ular orasida Shveytsariyaning eBay kompaniyasi va Xitoyning Alibaba Cloud platformasi ham bor.