BYDning uchta yangi modeli O‘zbekistonda rasmiy ro‘yxatdan o‘tkazildi

BYD kompaniyasi O‘zbekiston hududida uchta yangi avtomobil sanoat namunasini ro‘yxatdan o‘tkazdi. Bu haqda Adliya vazirligi huzuridagi Intellektual mulk departamenti matbuot xizmati xabar berdi.

Avtouzatuvchi idoraga o‘rtacha krossover, to‘liq o‘lchamli krossover va furgon modellarining dizaynini ro‘yxatdan o‘tkazish uchun hujjatlar topshirdi. Sanoat namunasining ro‘yxatdan o‘tkazilishi mahsulotning tashqi ko‘rinishini ifodalovchi estetik va konstruktiv-hunar jihatlarini himoya qilishga xizmat qiladi.

E’lon qilingan renderlarga ko‘ra, ro‘yxatdan o‘tgan namunalarga quyidagi modellarning mos kelishi ehtimoli katta:

• O‘rtacha krossover – BYD Seal 06 GT modeliga o‘xshaydi.
• Furgon – BYD e-Vali modeliga juda yaqin.
• To‘liq o‘lchamli krossover – BYDning premium subbrendi Denza N9 modeliga o‘xshash.

Elektr krossover BYD Seal 06 GT ilk bor 2024-yil oktabr oyida Chendu avtosalonida namoyish etilgan. U bir yoki ikki elektromotorli bir nechta modifikatsiyalarda taklif etiladi. Maksimal yurish zaxirasi 605 km gacha, Xitoyda boshlang‘ich narxi 150 ming yuan (taxminan 253,32 mln so‘m).

Olti o‘rinli krossover Denza N9 2024-yil noyabrda Guanchjou shahrida taqdim etilgan, savdosi esa mart oyida boshlangan. Modelning gibrid va to‘liq elektr versiyalari mavjud bo‘lib, yurish masofasi 1300 km gacha yetadi. Boshlang‘ich narxi 450 ming yuan (taxminan 759,96 mln so‘m).

BYD e-Vali furgoni ham 2024-yil kuzida taqdim etilgan. U ikki xil uzunlikda (5,8 va 7 metr) ishlab chiqariladi, yuk ko‘tarish quvvati mos ravishda 700 kg va 1,4 tonnani tashkil qiladi. Modelning savdosi joriy yilda boshlanishi rejalashtirilgan.