Umumiy 100 gektarlik yer uchastkalarida brussonetiya daraxti yetishtiriladi

Kambagʻal oila aʼzolari jalb etilgan holda Andijon, Jizzax, Qashqadaryo, Navoiy, Namangan, Samarqand, Surxondaryo, Toshkent va Farg‘ona viloyatlarining ayrim tumanlarida 100 gektar yer uchastkalarida brussonetiya daraxtini yetishtirish va qayta ishlash boʻyicha pilot loyihalar amalga oshiriladi. Bu haqda Kambagʻallikni qisqartirish va bandlik vazirligi ma’lum qildi. 

Bunda tuproq-iqlim sharoitidan kelib chiqib, kelgusi yillarda respublikaning boshqa hududlarida mazkur tajribani ommalashtirish choralari koʻriladi.

Shuningdek, 2025-yilda hududlarda kambagʻal oila aʼzolari jalb etilgan holda 20 ming gektar oʻrmon fondi yerlarida sanoatbop, manzarali va mevali daraxt turlaridan iborat oʻrmonlar barpo etish, koʻchatxonalar tashkil etish va dorivor oʻsimliklar yetishtirish loyihalari amalga oshiriladi.

Avvalroq, Aholi bandligini ta’minlash uchun “mahalla loyihasi” dasturiga $1 mlrd kredit ajratilishi haqida xabar berilgan edi.