2025-yil 1-sentabrdan ayrim chegara punktlarida ikki yo‘lakli nazorat tartibi joriy qilinadi

2025-yil 1-sentabrdan boshlab “Gʻishtko‘prik”, “Zangiota” va “Daut-Ata” o‘tkazish punktlarida sinov tariqasida avtotransport vositalari uchun ikki yo‘lakli (“yashil” va “qizil”) xavflarni boshqarish tamoyillariga asoslangan davlat nazorat tartibotini qo‘llash amaliyoti yo‘lga qo‘yiladi. Bu haqda Bojxona qo’mitasi ma’lum qilmoqda. 

Bunda “yashil yo‘lak” — xavf darajasi past bo‘lgan avtotransport vositalari va unga yuklangan tovarlarni chiqarib yuborish to‘g‘risida qaror qabul qilinishida, davlat nazoratining barcha shakllari ularga nisbatan amalga oshirilmaydi. Avtotransport vositasi va uning haydovchisiga nisbatan amalga oshiriladigan hujjatli nazorat bundan mustasno.

“Qizil yo‘lak” — davlat nazorati xavf darajasi yuqori va tasodifiy tanlovda aniqlangan avtotransport vositalariga nisbatan amalga oshiriladi. 

“Qizil” yoki “yashil” yo‘laklar bojxona organlarining “Xavflarni boshqarish” axborot tizimi orqali avtomatik tarzda belgilab beriladi. 

O‘tkazish punktidagi davlat nazorat organlari xodimlari tomonidan “profayling” tanlov asosida avtotransport vositalarini bojxona organlarining “Xavflarni boshqarish” axborot tizimida “yashil” yo‘lakdan “qizil” yo‘lakka yo‘naltirilib, tegishli nazorat shakllari qo‘llaniladi. 

Mazkur tartibot O‘zbekiston Respublikasiga kirib kelayotgan avtotransport vositalariga nisbatan faqatgina inspeksion ko‘rik majmuasi orqali nazoratdan o‘tkazilganidan so‘ng qo‘llaniladi.

Mazkur amaliyot sinov natijalariga ko‘ra 2026-yil 1-sentabrdan boshlab bosqichma-bosqich avtomobil yo‘li o‘tkazish punktlarida kuchga kiradi.