1-sentabrdan bog‘chada 3 yoshdan kichik bolasi bor oilalarga moddiy yordam beriladi

2025-yil 31-iyuldagi Vazirlar Mahkamasining 484-sonli qarori bilan rasmiy band bo‘lgan, yolg‘iz ona (ota) bo‘lgan va kambag‘al oilalar reyestriga kiritilgan shaxslarga maktabgacha ta’lim xizmatlaridan foydalanish uchun moddiy yordam to‘lash tartibi tasdiqlandi. Bu haqda Norma.uz xabar bermoqda.

Moddiy yordam oluvchilar reyestri shakllantiriladi va subsidiya miqdorini hisoblash hamda uni to‘lash jarayoni avtomatlashtiriladi.

2025-yil 1-sentabrdan boshlab yolg‘iz ona yoki otalar moddiy yordam olish uchun “Yagona milliy ijtimoiy himoya tizimi” axborot tizimi va YAIDXP (Yagona interaktiv davlat xizmatlari portali) orqali, shuningdek, “Inson” ijtimoiy xizmatlar markazlari yoki Davlat xizmatlari markazlariga bevosita murojaat qilishlari mumkin.

Moddiy yordam mablag‘lari oluvchining “ijtimoiy kartasi”ga o‘tkaziladi, agar u bo‘lmasa — “Xalq banki” ATda ochilgan bank kartalariga tushiriladi. Bank kartasini ochish uchun yordam oluvchilardan hech qanday to‘lov undirilmaydi.

Moddiy yordam bolaga 3 yoshga to‘lguncha har bir bola uchun 1,5 baravar BHM (bazaviy hisoblash miqdori)gacha bo‘lgan miqdorda, agar egizaklar bo‘lsa — har bir bola uchun, Davlat ijtimoiy himoya jamg‘armasi mablag‘lari hisobidan ijtimoiy shartnoma asosida beriladi.

Hujjat davlat tilidagi rasmiy matn shaklida Milliy qonunchilik ma’lumotlari bazasida e’lon qilingan va 2025-yil 1-avgustdan kuchga kirgan.