Qoraqalpog‘istondagi kripto-kompaniyalar 2035-yilgacha oylik yig‘imlardan ozod etildi

Istiqbolli loyihalar milliy agentligi Qoraqalpog‘iston hududidagi “Besqala Mining Valley” mayning zonasi rezidentlarini muntazam to‘lovlardan ozod qildi. Bu haqda regulyator matbuot xizmati xabar berdi.

Raqamli aktivlar bilan ishlash uchun yig‘imlarni undirish tartibiga kiritilgan o‘zgartirishlar Istiqbolli loyihalar milliy agentligi, Iqtisodiyot va moliya vazirligi hamda Soliq qo‘mitasi tomonidan ma’qullangan. Hujjat Adliya vazirligi tomonidan 27-iyul kuni davlat ro‘yxatidan o‘tkazildi.

Yangi tartibga muvofiq, “Besqala Mining Valley” hududida ro‘yxatdan o‘tgan kriptoaktivlar xizmatlari provayderlari 2035-yil 1-yanvargacha majburiy yig‘imlarni to‘lamaydi. Agentlik ushbu chora hududga xorijiy investorlarni jalb qilish va bozor ishtirokchilarining daromadlarini oshirishga xizmat qilishini kutmoqda. Mazkur o‘zgartirishlar loyihasi joriy yil iyun oyida jamoatchilik muhokamasi uchun e’lon qilingan edi.

O‘zgartirishlar kuchga kirishidan avval yig‘imlar biznes yo‘nalishiga qarab belgilanardi.

Xususan, kriptovalyuta mayningi bilan shug‘ullanuvchilar uchun yig‘im 4,12 mln so‘m, depozitariylar uchun 2,06 mln so‘mni tashkil etgan.

Mayning-pullar faoliyati uchun 41,2 mln so‘m, kripto-do‘konlar uchun 76,22 mln so‘m, kriptobirjalar uchun esa 304,88 mln so‘m miqdorida yig‘im undirilgan.

Prezident Mirziyoyev aprel oyida Besqala Mining Valley kriptovalyuta qazib olish zonasini tashkil etish haqidagi qarorni imzolagandi. Mintaqada ro‘yxatdan o‘tgan yuridik shaxslar rezident bo‘lishlari mumkin, ular direksiyaga ariza topshirib, ILMAdan ruxsatnoma olgandan so‘ng kriptoaktivlarni qazib olish, sotish va ayirboshlash huquqini oladi.