O‘zbekistonda avtomobilni boshqarish uchun ishonchnomaga o‘zgartirish kiritilmoqda

Xususan, ishonch bildirilgan shaxs uni mamlakat tashqarisiga olib chiqishi mumkin

Фото: Абдумавлон Мадмусаев / Kapital.uz

Avtomobilni boshqarish uchun ishonchnomaga ishonch bildirilgan shaxsga uni mamlakat tashqarisiga olib chiqish huquqini beruvchi bandni kiritish rejalashtirilmoqda. Bu haqdagi qaror loyihasi jamoatchilik muhokamasi uchun e’lon qilindi. Hujjat O‘zbekiston Iqtisodiyot va moliya vazirligi tomonidan tayyorlangan.

Loyihada avtomototransportlarga nisbatan rasmiylashtirilgan ishonchnomada mazkur avtomototransportlarning respublika hududidan olib chiqish huquqi mavjudligi yoki cheklanganlik holatini qayd etish nazarda tutilgan.

Loyihaga ilova qilingan ma’lumotnomada ishonchnoma asosida avtotransport vositalarini olib chiqib, ularni chet elda sotish holatlari tez-tez uchrayotgani qayd etilgan. Hujjatda keltirilgan statistikaga ko‘ra, 2024-yilda 50 ga yaqin fuqarolarga tegishli transport vositalarining olib chiqilib, qaytarilmagani aniqlangan. 2025-yil iyun oyining o‘zida 8 ta shunday holat qayd etilgan.