Milliy valyutadagi kreditlar bo‘yicha o‘rtacha foiz stavkasi 19,7% ni tashkil etdi

Markaziy bank ma’lumotlariga ko‘ra, 2026-yil aprel oyida milliy valyutadagi kreditlar bo‘yicha o‘rtacha tortilgan nominal foiz stavkasi 19,7% ni tashkil etdi.

Shundan jismoniy shaxslarga ajratilgan kreditlar bo‘yicha o‘rtacha stavka 20,4%, yuridik shaxslarga berilgan kreditlarda esa 19,4% darajasida shakllangan.

Milliy valyutadagi kreditlar tarkibida tijorat kreditlari bo‘yicha o‘rtacha foiz stavkasi 22% ni tashkil etgan bo‘lsa, imtiyozli kreditlar bo‘yicha bu ko‘rsatkich 9,3% bo‘lgan. Jismoniy shaxslarga ajratilgan kreditlar orasida bir yilgacha bo‘lgan kreditlar bo‘yicha stavkalar eng yuqori bo‘lib, 25,6% ni tashkil etdi. Bir yildan ortiq muddatga berilgan kreditlarda esa o‘rtacha foiz stavkasi 20,3% bo‘lgan.

Yuridik shaxslarga ajratilgan kreditlar bo‘yicha bir yilgacha bo‘lgan qarz mablag‘lari uchun o‘rtacha stavka 21,1%, bir yildan ortiq muddatli kreditlarda esa 18,5% ni tashkil etgan.

Tijorat kreditlari bo‘yicha stavkalar yuqoriligicha qolmoqda

Aprel oyida tijorat kreditlari bo‘yicha o‘rtacha foiz stavkasi 22% darajasida qayd etildi.

Jismoniy shaxslarga berilgan tijorat kreditlari bo‘yicha o‘rtacha stavka 21,3% bo‘lgan. Bir yilgacha bo‘lgan kreditlarda bu ko‘rsatkich 27,8% ga yetgan bo‘lsa, uzoq muddatli kreditlarda 21,2% ni tashkil qilgan.

Yuridik shaxslar uchun tijorat kreditlari bo‘yicha o‘rtacha stavka 22,6% bo‘lib, bir yilgacha bo‘lgan kreditlarda 21,9%, bir yildan ortiq muddatli kreditlarda esa 23% darajasida shakllangan.

Imtiyozli kreditlar bo‘yicha stavkalar 10% dan past

Markaziy bank ma’lumotlariga ko‘ra, imtiyozli kreditlar bo‘yicha o‘rtacha foiz stavkasi 9,3% ni tashkil etgan.

Jismoniy shaxslarga ajratilgan imtiyozli kreditlar bo‘yicha o‘rtacha stavka 11,1% bo‘lgan. Bir yilgacha muddatli kreditlarda bu ko‘rsatkich 4,1%, bir yildan ortiq muddatli kreditlarda esa 11,3% ni tashkil qilgan.

Yuridik shaxslarga ajratilgan imtiyozli kreditlar bo‘yicha o‘rtacha foiz stavkasi 8,9% bo‘lib, qisqa muddatli kreditlarda 8,1%, uzoq muddatli kreditlarda esa 9% darajasida qayd etilgan.

Real foiz stavkalari 8% dan yuqori bo‘ldi

Aprel oyida aholi inflyatsion kutilmalari 10,6%, biznes subyektlarining inflyatsion kutilmalari esa 10,3% ni tashkil etdi.

Shu asosda hisoblangan real foiz stavkalari jismoniy shaxslarga berilgan milliy valyutadagi kreditlar bo‘yicha 8,8%, yuridik shaxslarga berilgan kreditlar bo‘yicha esa 8,2% darajasida shakllangan.

Tijorat kreditlari segmentida real foiz stavkasi jismoniy shaxslarda 9,7%, yuridik shaxslarda esa 11,1% ni tashkil etgan.

Imtiyozli kreditlar bo‘yicha real foiz stavkasi jismoniy shaxslarda 0,5% bo‘lgan bo‘lsa, yuridik shaxslar uchun manfiy hududda qolib, minus 1,3% ni tashkil qilgan.

2026-yil aprel holatiga ko‘ra, chet el valyutasidagi kreditlar bo‘yicha o‘rtacha foiz stavkasi 10,2% ni tashkil etdi.

Bir yilgacha bo‘lgan valyuta kreditlari bo‘yicha stavka 9,5%, bir yildan ortiq muddatli kreditlarda esa 10,4% bo‘lgan.

Yillik hisobda valyutadagi kreditlar bo‘yicha o‘rtacha stavka 0,2 foiz punktga oshgan. Bir yilgacha bo‘lgan kreditlarda ham 0,2 foiz punktlik o‘sish qayd etilgan, uzoq muddatli kreditlar bo‘yicha esa stavkalar o‘zgarishsiz qolgan.